قائداعظمؒ نے ایک قوم کو شناخت، عزت اور آزادی سے جینے کا حق دلوایا، صدر مملکت

اسلام آباد: صدر مملکت آصف علی زرداری نے کہا ہے کہ قائداعظمؒ نے ایک قوم کو شناخت، عزت اور آزادی سے جینے کا حق دلوایا۔

صدر مملکت آصف علی زرداری نے قائداعظم محمدعلی جناحؒ کی 77 ویں برسی کے موقع پر جاری پیغام میں کہا کہ آج کے دن بانی پاکستان قائداعظم محمدعلی جناحؒ کو خراج تحسین پیش کرتے ہیں، عظیم رہنما نے غیرمعمولی بصیرت، غیر متزلزل عزم اور اصولی قیادت سے تاریخ کا دھارا بدل دیا۔

انہوں نے کہا کہ قائداعظمؒ کے مشکور ہیں کہ انہوں نے برصغیر کے مسلمانوں کے لیے ایک علیحدہ وطن قائم کیا، آزاد وطن میں ہم اپنی زندگیوں کو اپنے عقائد، امنگوں اور اسلامی اصولوں کے مطابق ڈھال سکتے ہیں۔

ان کا کہنا تھا کہ سماجی ومعاشی انصاف کےاصولوں کو فروغ دے سکتے ہیں، قائداعظمؒ نے ایک قوم کو شناخت، عزت اور آزادی سے جینے کا حق دلوایا، ایک اسلامی ریاست جو انصاف، رواداری اور جمہوریت کی بنیادوں پر قائم ہو۔

آصف علی زرداری نے کہا کہ قائداعظمؒ کا خواب ایک ترقی پسند، جامع اور مستقبل کی جانب گامزن ریاست کا تھا، ہر شہری کو چاہیے اس کا تعلق کسی بھی مذہب، ذات یا نسل سے ہو، برابر کے حقوق اور مواقع میسر آئیں۔

صدر مملکت کا مزید کہنا تھا کہ آج بھارت میں اقلیتوں، خصوصاً مسلمانوں کے ساتھ سلوک نے حقیقت کو آشکار کردیا ہے، قائداعظم محمدعلی جناحؒ کا پیش کردہ دو قومی نظریہ بالکل درست تھا، بھارت کی اقلیتیں تسلیم کررہی ہیں کہ ان کے مذہبی، سیاسی اور سماجی حقوق اب محفوظ نہیں رہے۔