شناختی کارڈ بنوانے والوں کیلئے بڑی خوشخبری؛ نادرا کا اہم اعلان

نیشنل ڈیٹابیس اینڈ رجسٹریشن اتھارٹی (نادرا) نے سندھ بھر میں شناختی دستاویزات کی سہولتوں کو بہتر بنانے کے لیے 13 نئے دفاتر اور میگا سینٹرز قائم کرنے کا اعلان کیا ہے۔

سندھ کے چیف سیکریٹری ڈاکٹر آصف حیدر شاہ اور نادرا کے اعلیٰ سطحی وفد کے درمیان ملاقات ہوئی جس میں سندھ بھر میں شناختی دستاویزات کی سہولتوں کو بہتر بنانے کے لیے 13 نئے دفاتر اور میگا سینٹرز قائم کرنے کا فیصلہ کیا گیا۔

ملاقات کے دوران صوبے میں ڈیجیٹل پراپرٹی ٹرانسفر اور زمین کے ریکارڈ کی آن لائن مینجمنٹ جیسے موضوعات پر بھی گفتگو ہوئی، جو کہ سندھ حکومت کے ڈیجیٹل گورننس کے ویژن کا حصہ ہیں۔ ڈاکٹر آصف حیدر شاہ نے کہا کہ سندھ اب آن لائن جائیداد کی منتقلی کے نظام کی طرف بڑھ رہا ہے، جو حکومتی نظام میں جدیدیت کے عزم کی عکاسی کرتا ہے۔

نادرا اور صوبائی حکومت نے خاص طور پر دیہی علاقوں کے عوام کو فائدہ پہنچانے کے لیے ڈیجیٹل تبدیلی پر قریبی تعاون کو مضبوط بنانے پر اتفاق کیا ہے۔ اس توسیعی منصوبے کے تحت کراچی کی تمام یونین کونسلز میں نادرا کے کاؤنٹرز قائم کیے جائیں گے۔ اس بات کی تصدیق کراچی کے میئر مرتضیٰ وہاب نے لانڈھی کے بابربازار میں اپ گریڈ شدہ رجسٹریشن سینٹر کی افتتاحی تقریب کے دوران کی۔

مزید برآں، کراچی کے علاقوں گلشنِ اقبال، گلبرگ اور سرجانی ٹاؤن میں جدید سہولیات سے آراستہ نادرا میگا سینٹرز بھی قائم کیے جا رہے ہیں، جہاں وہیل چیئر رسائی، اضافی نشستوں کی گنجائش اور بہتر سروس کاؤنٹرز شامل ہوں گے۔

نادرا میگا سینٹرز ناظم آباد اور سائٹ ایریا میں پاسپورٹ پراسیسنگ کاؤنٹرز بھی قائم کر دیے گئے ہیں، جبکہ کراچی کے سینٹرل اور ویسٹرن اضلاع میں نئے پاسپورٹ دفاتر بھی کھولے گئے ہیں۔ وزارتِ داخلہ کے تحت یہ اقدامات پاسپورٹ اور رجسٹریشن کے عمل کو سہل اور مؤثر بنانے کے لیے کیے جا رہے ہیں۔

اس کے علاوہ نادرا نے عوامی سہولت کے لیے پاک آئی ڈی موبائل ایپ کا نیا ورژن 5.0.0 بھی متعارف کرا دیا ہے، جس میں بہتر ڈیش بورڈ، تیز تر شناختی کارڈ کی منسوخی کا عمل، بہتر سرچ آپشنز اور اردو و انگریزی زبان کی سہولت فراہم کی گئی ہے، تاکہ خاص طور پر دیہی علاقوں کے صارفین کو فائدہ ہو سکے۔