سربراہ بحریہ ٹاؤن ملک ریاض اور بیٹے کے خلاف سخت قانونی کارروائی کا آغاز

عدالت نے آج بحریہ ٹاؤن کے سربراہ ملک ریاض اور ان کے بیٹے علی ریاض کے خلاف سخت قانونی کارروائی کا آغاز کرتے ہوئے انہیں اشتہاری قرار دینے کی باقاعدہ کارروائی شروع کر دی ہے۔

 عدالت نے دو ٹوک اعلان کیا کہ اگر دونوں ملزمان 13 اکتوبر 2025 کو عدالت کے روبرو پیش نہ ہوئے تو قانون کے مطابق انہیں اشتہاری قرار دے دیا جائے گا اور ان کے خلاف کارروائی آگے بڑھائی جائے گی۔

آج کی سماعت میں مقدمہ نمبر 58/25 میں ملزمان عطا الحسن اور سجاد حیدر عدالت میں پیش ہوئے اور نقول تقسیم کی گئیں۔

 مقدمہ نمبر 59/25 میں ملزمان عطا الحسن اور محمد عمران عدالت میں موجود رہے، جنہیں نقول فراہم کر دی گئیں۔

ایک اہم ملزم خلیل الرحمن دونوں مقدمات میں عدالت کے روبرو پیش نہ ہوا اور اس کے وکیل نے بیماری کو بنیاد بنا کر حاضری معافی کی درخواست دائر کی۔

 عدالت نے اس مؤقف کو تاخیری حربہ قرار دیا اور دو ٹوک مؤقف اختیار کرتے ہوئے اعلان کیا: صحت کے نام پر تاخیری حربے کسی صورت قبول نہیں کیے جائیں گے۔

 عدالت نے واضح حکم جاری کیا کہ ملزم خلیل الرحمن کو نقول فراہم نہیں کی جائیں گی جب تک وہ خود عدالت میں پیش نہ ہو۔

 عدالت نے مزید ہدایت دیتے ہوے کہا کہ آئندہ تاریخ پر ہر صورت گواہ پیش کیے جائیں، ورنہ قانون کے مطابق سخت ترین کارروائی عمل میں لائی جائے گی۔

مقدمہ نمبر 58/25 کی سماعت اب 15 ستمبر 2025اور مقدمہ نمبر  59/25 کی سماعت 17ستمبر  تک ملتوی کر دی گئی ہے، تاہم عدالت کے ریمارکس نے واضح کر دیا ہے کہ تاخیری حربے اب کسی صورت برداشت نہیں کیے جائیں گے اور قانونی عمل پوری سختی سے آگے بڑھایا جائے گا۔