ایچ پی وی ویکسین سے بچیوں کی طبیعت خراب ہونے کا دعویٰ؟ بڑی حقیقت سامنے آگئی

پاکستان میں ہیومن پیپیلوما وائرس (ایچ پی وی) ویکسین کی قومی مہم کا باقاعدہ آغاز ہو چکا ہے، جس کا مقصد 9 سے 14 سال کی عمر کی لڑکیوں کو سروائیکل کینسر جیسے مہلک مرض سے تحفظ فراہم کرنا ہے۔

 اس مہم کے تحت ملک بھر میں پبلک اسکولوں، ہیلتھ سینٹرز، کمیونٹی مراکز اور موبائل ٹیموں کے ذریعے ویکسین کی فراہمی کی جا رہی ہے۔ عالمی ادارہ صحت (ڈبلیو ایچ او) کے تعاون سے اس مہم کے لیے 49 ہزار سے زائد ہیلتھ ورکرز کو تربیت دی گئی ہے، جو ایک ڈوز پر مشتمل یہ ویکسین لڑکیوں کو فراہم کریں گے۔ پاکستان اس اقدام کے بعد دنیا کا 150واں ملک بن گیا ہے جس نے ایچ پی وی ویکسین متعارف کرائی ہے۔

تاہم ویکسینیشن مہم کے آغاز کے ساتھ ہی سوشل میڈیا پر اس کے خلاف ایک منظم مہم بھی سامنے آئی ہے۔ بعض صارفین نے یہ دعویٰ کیا کہ ایچ پی وی ویکسین لڑکیوں کو ماں بننے کی صلاحیت سے محروم کرنے کے لیے دی جا رہی ہے، جبکہ ایک ویڈیو وائرل ہوئی جس میں کہا گیا کہ اسکول میں بچیوں کو زبردستی ویکسین دی گئی جس کے بعد ان کی طبیعت خراب ہو گئی اور انہیں اسپتال منتقل کرنا پڑا۔

👩🏼‍🎓سکولوں میں زبردستی ویکسینیشن کے بعد کئی بچیوں کی طبیعت خراب ہو گئی اور اُنہیں اسپتال منتقل کرنا پڑا
🤲خدارا! اپنے بچوں کے معاملے میں صاف اور دو ٹوک موقف اختیار کریں
☢️دنیا کے سب تجربے ہمیشہ ہم غریبوں پر ہی کیے جاتے ہیں💔
💉سیلاب زدگان کیلیے مدد نہیں پر مغرب فری ویکسین دے رہا ہے pic.twitter.com/QBr6BJ9OZ0

— Abdullah Gul (@MAbdullahGul) September 16, 2025

اس ویڈیو کے حوالے سے جب تحقیقات کی گئیں تو معلوم ہوا کہ اس کا ایچ پی وی ویکسین سے کوئی تعلق نہیں ہے۔ دراصل یہ ویڈیو 2024 میں آزاد کشمیر کے علاقے ڈڈیال کی ہے، جہاں 9 مئی کو احتجاجی ریلی کے دوران پولیس اور مظاہرین کے درمیان جھڑپ ہوئی تھی۔ آنسو گیس کی شیلنگ کے باعث ہائی اسکول کی کم از کم 22 طالبات بے ہوش ہو گئی تھیں، جبکہ 12 پولیس اہلکار بھی زخمی ہوئے تھے۔ اس واقعے کو ویکسین سے جوڑنا سراسر غلط اور گمراہ کن ثابت ہوا۔

سر بندا اب آپکو کیا کہے۔
یہ ڈڈیال کا مئی 2024 کا واقعہ ہے پولیس کی طرف احتجاج کر نے والو پر آنسو گیس شیلنگ کی وجہ سے کچھ بچوں کی طبیعت خراب ہوئی تو ان کو اسپتال لایا گیا https://t.co/XlFX6JUkjV

— iffi (@iffiViews) September 16, 2025

ڈڈیال پولیس ریاستی اور غیر ریاستی فورس کا آنسو گیس دیگر زہریلی گیس کا استعمال جس سے سکول کے بچے بے ہوش ذرائع کے کچھ بچوں کی حالت تشویشناک بتائی گئی ہے pic.twitter.com/LJVFddOaD9

— sardar tahir (@sardartahir8685) May 9, 2024

ویکسین مہم کے دوران والدین کو آگاہی فراہم کرنے کے لیے وائس میسیجز، کمیونٹی سیشنز اور دیگر ذرائع استعمال کیے جا رہے ہیں تاکہ معاشرے میں موجود غلط فہمیوں اور افواہوں کا مؤثر انداز میں ازالہ کیا جا سکے۔ حکام نے زور دیا ہے کہ یہ ویکسین محفوظ ہے اور اس کا مقصد صرف اور صرف بچیوں کو مستقبل میں سروائیکل کینسر جیسے خطرناک مرض سے بچانا ہے۔