افغانستان سے ٹی ٹی پی اور ’را‘ کی سرگرمیاں ختم کی جائیں، پاکستان کا طالبان حکومت کو انتباہ

اسلام آباد: پاکستان نے افغانستان میں تحریک طالبان پاکستان (ٹی ٹی پی) اور بھارتی خفیہ ایجنسی ’’را‘‘ کی سرگرمیوں پر شدید تحفظات کا اظہار کرتے ہوئے طالبان حکومت کو سخت پیغام دے دیا ہے۔

تفصیلات کے مطابق دفتر خارجہ نے پاکستان میں تعینات افغان عبوری سفیر سردار احمد شکیب کو طلب کرکے طالبان حکومت سے واضح طور پر کہا ہے کہ وہ ٹی ٹی پی سے فوری طور پر لاتعلقی اختیار کرے اور اس بات کو یقینی بنائے کہ افغان سرزمین پاکستان کے خلاف دہشت گردانہ کارروائیوں کے لیے استعمال نہ ہو۔

اعلیٰ سفارتی ذرائع کے مطابق افغان سفیر کو دفتر خارجہ میں ایڈیشنل فارن سیکرٹری سید علی اسد گیلانی نے پاکستان کا انتباہ پہنچایا۔

اس موقع پر انہیں آگاہ کیا گیا کہ ’’فتنہ الخوارج‘‘ دہشت گردوں کی حالیہ بڑھتی سرگرمیاں پاکستان کے لیے شدید تشویش کا باعث ہیں، ان دہشت گردوں کو افغانستان میں پناہ حاصل ہے اور بھارتی خفیہ ایجنسی ’’را‘‘ کی مکمل مالی امداد اور سرپرستی میسر ہے۔

ذرائع کے مطابق اسلام آباد نے اپنے سفارتی پیغام میں زور دیا ہے کہ طالبان حکومت اپنی سرزمین سے دہشت گردوں کے خاتمے کے وعدوں پر عمل کرے اور دہشت گرد تنظیموں کے خلاف عملی اقدامات کرے۔

ادھر، افغانستان کے لیے پاکستان کے خصوصی نمائندے محمد صادق خان بھی متحدہ عرب امارات سے غیر اعلانیہ مشن مکمل کرکے وطن واپس پہنچ گئے ہیں۔ وہ اپنی کارروائی سے متعلق تفصیلی رپورٹ وزیر اعظم کو پیش کریں گے اور امکان ہے کہ اسی ہفتے وہ سینئر حکام کے ایک وفد کے ہمراہ کابل کا دورہ کریں گے تاکہ افغان طالبان قیادت کو براہ راست پاکستان کے تحفظات سے آگاہ کیا جا سکے۔