حکومت کا بے نظیر انکم سپورٹ پروگرام بند کرنے کا فیصلہ؟

حکومت نے بے نظیر انکم سپورٹ پروگرام سے متعلق بڑا فیصلہ کرلیا ہے۔

وزیراعظم شہباز شریف کے مشیر سینیٹر رانا ثناء اللہ نے نجی ٹی وی چینل کے پروگرام میں گفتگو کے دوران بے نظیر انکم سپورٹ پروگرام (بی آئی ایس پی) سے متعلق اہم بیان دیتے ہوئے کہا ہے کہ اس پروگرام کو موجودہ شکل میں جاری رکھنا ممکن نظر نہیں آتا، اور اس میں بڑی اصلاحات یا اسے مکمل طور پر ختم کرنے کی ضرورت ہے۔

رانا ثناء اللہ کے مطابق وفاقی حکومت اس پروگرام پر بھاری رقم خرچ کر رہی ہے، جو ملک کی موجودہ اقتصادی صورتحال کے پیش نظر ایک بھاری بوجھ بنتا جا رہا ہے۔

 ان کا کہنا تھا کہ مالی امداد کی موجودہ شکل کے بجائے بی آئی ایس پی کو بے نظیر روزگار اسکیم یا ہنر مند اسکیم میں تبدیل کیا جائے، تاکہ مستحق افراد کو مستقل روزگار اور ہنر کے ذریعے خودکفالت کی طرف گامزن کیا جا سکے۔

سینیٹر رانا ثنااللّہ خان کا بڑا بیان!!! ‼️‼️‼️

بےنظیر انکم سپورٹ پروگرام کو ختم کیا جائے اسے reform کرنے کی ضرورت ہے۔ اسے بےنظیر روزگار سکیم یا ہنرمند سکیم بنایا جائے۔ بہت بڑی رقم وفاق دیتا ہے جو مناسب نہیں۔ اس پر پارلیمنٹ میں بات ہو گی۔ پیپلزپارٹی کے بڑوں سے بات ہوئی ہے وہ اس…

— Gharidah Farooqi (T.I.) (@GFarooqi) September 17, 2025

انہوں نے بتایا کہ اس معاملے پر پارلیمنٹ میں بحث کی جائے گی اور پیپلز پارٹی کے رہنماؤں سے بھی ابتدائی مشاورت ہو چکی ہے، جو اصلاحات کے حوالے سے متفق دکھائی دیتے ہیں۔ رانا ثناء اللہ نے کہا کہ سیلاب متاثرین کی امداد کے لیے بی آئی ایس پی کا استعمال نہ تو کیا گیا ہے اور نہ ہی ایسا ہونا چاہیے، کیونکہ اس پروگرام کا مقصد صرف مالی امداد نہیں بلکہ مستحقین کو پائیدار سہارا فراہم کرنا ہونا چاہیے۔

تاہم ان بیانات کے بعد خدشہ ظاہر کیا جا رہا ہے کہ اگر بی آئی ایس پی کو ختم کیا گیا یا اس کی نوعیت میں بنیادی تبدیلیاں کی گئیں تو ملک بھر میں لاکھوں مستحق خاندان متاثر ہو سکتے ہیں، جو کئی سالوں سے اس پروگرام پر اپنے روزمرہ اخراجات اور بنیادی ضروریات کے لیے انحصار کر رہے ہیں۔