بھارتی سائفر ڈارک ویب پر لیک ہوا،جوائنٹ ایکشن کمیٹی اور بھارتی ایجنسیوں کا تعلق بے نقاب، وزیراعظم آزاد کشمیر

وزیراعظم آزاد کشمیر چودھری انوار الحق نے کہا ہےکہ بھارتی سائفر ڈارک ویب پر لیک ہوا تھا جس سے جوائنٹ ایکشن کمیٹی اور بھارتی ایجنسیوں کا گٹھ جوڑ بے نقاب ہوا۔

وزیراعظم آزاد کشمیر کا مزید کہنا تھا کہ چور کی داڑھی میں تنکا نہیں تو ایکشن کمیٹی وضاحت کیوں دے رہی ہے، ایکشن کمیٹی تشدد کا راستہ چھوڑ کر آئینی و قانونی راستے پر آئے، آزاد کشمیر اسمبلی میں پاکستان اور بیرون ملک مقیم کشمیریوں کی مخصوص نشستوں کو ختم نہیں کیا جاسکتا۔

انھوں نے کہا کہ بطور وزیراعظم خواہش ہوگی کہ حالات پرامن رہیں اور انسانی جانوں کے ضیاع کے اندیشوں سے بچنے کی کوشش کی جاتی رہے گی۔

چودھری انوار الحق کا کہنا تھا کہ ایکشن کمیٹی پرانی فوٹیجز چلا کر نوجوانوں کے ذہن کو خراب کررہی ہے جس میں سکیورٹی فورسز کو نشانہ بنایا جارہا ہے، یہ ہجوم جمع کرکے کیا کرنا چاہتے ہیں؟

وزیراعظم آزاد کشمیر نے مزید کہا کہ انہوں نے کبھی 3 روپے بجلی نہیں مانگی وہ تو ہم نے اس کے لیے کوشش کی، یہ تو پاکستان کی قیادت نے فیصلہ کیا کہ جو چیز دنیا میں کہیں نہیں ہوتی مگر ہم آزاد کشمیر کے لوگوں کو دیں گے تاکہ رشتے میں دراڈ نہ آئے۔