اوورسیز پاکستانیوں کو نادرا نے خوشخبری سنا دی

نیشنل ڈیٹابیس اینڈ رجسٹریشن اتھارٹی کی جانب سے شروع کیا گیا پاکستان اوریجن کارڈ پروگرام بیرون ملک مقیم پاکستانی نژاد افراد کو وطن سے جوڑنے اور انہیں متعدد خصوصی سہولیات فراہم کرنے کے لیے متعارف کرایا گیا ہے۔

پاکستان اوریجن کارڈ (پی او سی)  ان افراد کے لیے ہے جو پاکستانی شہریت ترک کر چکے ہیں یا جن کے والدین پاکستانی تھے، اور وہ اب ایسے ممالک کی شہریت رکھتے ہیں جن کے ساتھ پاکستان کا دوہری شہریت کا معاہدہ نہیں ہے۔

پی او سی رکھنے والے افراد کو پاکستان میں بغیر ویزہ متعدد بار داخلے، غیر معینہ مدت تک قیام اور بغیر پولیس رپورٹنگ کے رہائش کی سہولت حاصل ہوتی ہے۔ اس کے علاوہ وہ پاکستان میں جائیداد خریدنے، اس کا انتظام سنبھالنے، بینک اکاؤنٹ کھولنے، قومی شناختی کارڈ کے بجائے اسے بطور شناخت استعمال کرنے اور فوری امیگریشن کلیئرنس جیسی سہولیات سے بھی مستفید ہو سکتے ہیں۔ پی او سی ہولڈرز کے لیے پاکستان میں ملازمت کے مواقع بھی دستیاب ہیں۔

نادرا کی جانب سے جاری کردہ اسمارٹ پی او سی خصوصی طور پر ان افراد کے لیے ہے جنہوں نے یا جن کے والدین نے پاکستانی شہریت چھوڑ دی ہو اور وہ اب ایسے ممالک کے شہری ہیں جن کے ساتھ پاکستان کا دوہری شہریت کا معاہدہ نہیں۔ پاکستانی شہریوں کے غیر ملکی شریکِ حیات بھی اس کارڈ کے لیے اہل قرار دیے گئے ہیں۔

یہ پروگرام ان سابق پاکستانی شہریوں، پاکستانی نسب رکھنے والے غیر ملکی شہریوں اور پاکستانی یا سابق پاکستانی شہریوں سے شادی شدہ غیر ملکیوں کے لیے دستیاب ہے۔ تاہم بھارت، اسرائیل، تائیوان، غیر تسلیم شدہ یا دشمن ممالک کے شہری اس پروگرام سے استفادہ نہیں کر سکتے۔

واضح رہے کہ پاکستان کا 21 ممالک کے ساتھ دوہری شہریت کا معاہدہ موجود ہے، جن میں امریکہ، برطانیہ، کینیڈا، جرمنی اور آسٹریلیا شامل ہیں۔ اسمارٹ پی او سی کے لیے درخواست نادرا کی پاک آئی ڈی موبائل ایپ کے ذریعے دی جا سکتی ہے، جہاں نئی درخواست، تجدید، ترمیم یا منسوخی جیسے تمام مراحل آن لائن مکمل کیے جا سکتے ہیں۔

یہ پروگرام بیرون ملک مقیم پاکستانیوں اور ان کے خاندانوں کے لیے اپنی شناخت برقرار رکھنے اور قانونی پیچیدگیوں کے بغیر وطن سے جڑے رہنے کا ایک اہم اور سہل ذریعہ بن کر سامنے آیا ہے۔