وزیراعظم شہباز شریف کی امریکی صدر ڈونلڈ ٹرمپ سے ملاقات

نیویارک: عرب اسلامی سربراہی اجلاس کے اختتام پر وزیراعظم شہباز شریف اور امریکی صدر ڈونلڈ ٹرمپ کی ملاقات ہوئی۔

دونوں رہنماؤں نے خوشگوار اور غیر رسمی ماحول میں مصافحہ کیا اور مختلف امور پر بات چیت کی، اس موقع پر نائب وزیراعظم اسحاق ڈار بھی موجود تھے۔

ذرائع کے مطابق وزیراعظم اور امریکی صدر کے درمیان 25 ستمبر کو ایک ون آن ون ملاقات متوقع ہے جس میں اہم عالمی اور علاقائی معاملات پر تفصیلی گفتگو کی جائے گی۔

اقوام متحدہ کی جنرل اسمبلی کے اجلاس کے دوران ایک نجی ٹی وی کو دیے گئے انٹرویو میں وزیراعظم شہباز شریف نے کہا کہ امریکی صدر عالمی امن کے قیام کے لیے سنجیدہ ہیں۔

ان کا کہنا تھا کہ صدر ٹرمپ کے خطاب میں اہم نکات شامل تھے اور پاک بھارت کشیدگی کم کرنے میں بھی ان کا کردار نمایاں رہا ہے۔

وزیراعظم نے واضح کیا کہ پاکستان خطے میں امن و استحکام کے فروغ کے لیے عالمی برادری کے ساتھ تعاون جاری رکھے گا اور مسائل کے پائیدار حل کے لیے ہر ممکن اقدامات کرے گا۔