ڈرائیونگ لائسنس بنوانے والوں کی بڑی مشکل آسان ہوگئی

ڈرائیونگ لائسنس کے اجرا کے حوالے سے شہریوں کے لیے بڑی سہولت متعارف کروا دی گئی ہے، جس کے تحت اب شہری دن رات لائسنس سے متعلقہ خدمات حاصل کر سکیں گے۔

 آئی جی اسلام آباد کی زیر صدارت پبلک سروس ڈلیوری کے حوالے سے ایک اہم اجلاس منعقد ہوا، جس میں ٹریفک نظام کو مؤثر بنانے اور عوام کو سہولت فراہم کرنے کے لیے اہم فیصلے کیے گئے۔

اسلام آباد پولیس کے ترجمان کے مطابق آئی جی نے ڈرائیونگ لائسنس کے اجرا کا عمل تیز کرنے اور عوامی سہولیات میں بہتری کی ہدایات جاری کیں۔

 اجلاس میں فیصلہ کیا گیا کہ ایف-6 خدمت مرکز کے ساتھ ساتھ ٹریفک پولیس دفتر فیض آباد کو 24 گھنٹے کھلا رکھنے کا اقدام کیا جائے گا، تاکہ شہری کسی بھی وقت اپنی ضروریات پوری کر سکیں۔

علاوہ ازیں، خدمت مراکز کے اوقات کار میں بھی توسیع کر دی گئی ہے، اب یہ مراکز شام 6 بجے کے بجائے رات 9 بجے تک کھلے رہیں گے۔ اجلاس میں اس بات پر بھی زور دیا گیا کہ آئندہ مرحلے میں تھانوں سے بھی ٹریفک سے متعلقہ سہولتیں فراہم کی جائیں گی تاکہ عوام کو مزید آسانی میسر ہو۔

پولیس ترجمان نے خبردار کیا کہ یکم اکتوبر 2025 کے بعد بغیر ڈرائیونگ لائسنس گاڑی چلانے والوں کے خلاف سخت کارروائی کی جائے گی، جس میں مقدمہ درج کرنا، گاڑی ضبط کرنا اور گرفتاری جیسے اقدامات شامل ہوں گے۔