دہشت گردوں کو کسی صورت رعایت نہیں دی جائے گی، وزیراعلیٰ بلوچستان

وزیراعلیٰ بلوچستان سرفراز بگٹی کا کہنا ہے کہ دہشت گردوں کو کسی صورت رعایت نہیں دی جائے گی۔

وزیراعلیٰ بلوچستان سرفراز بگٹی نے نیوز کانفرنس کرتے ہوئے کہا کہ بلوچستان میں قیام امن کیلئے اقدامات کررہے ہیں، دہشت گردوں کو کسی صورت رعایت نہیں دی جائے گی، دہشت گرد نہتے شہریوں کو نشانہ بنارہے ہیں۔

انہوں نے کہا کہ ہم نے چاغی میں انٹیلی جنس بیسڈ آپریشن کیا، آپریشن میں زبیر نامی شخص اور اس کا ساتھی مارا گیا، ان کے تیسرے ساتھی جہانزیب نے ہتھیار ڈال دیے، دیگر آپریشن میں مارے گئے، دہشت گرد اہم تنصیبات کو نشانہ بنانا چاہتے تھے، سیکیورٹی فورسز نے دہشت گردوں کی متعدد کارروائیوں کو بروقت ناکام بنایا۔

سرفرا ز بگٹی نے کہا کہ آپریشن کے دوران ایک جوان بھی زخمی ہوا، دہشت گرد جہانزیب نے ویڈیو بیان میں مختلف کارروائیوں کا اعتراف کیا، دہشت گرد جہانزیب دالبندین میں ہتھیار سپلائی کرتا تھا، ہائی ویلیو ٹارگٹ کو پکڑنا فورسز کی اہم کامیابی ہے، دہشت گردوں کیخلاف سخت فضائی اور زمینی آپریشن ضروری ہے۔

وزیر اعلیٰ بلوچستان نے کہا کہ افغان حکومت اپنی سرزمین دہشت گردوں کیلئے استعمال نہ ہونے دے، انتہا پسند نوجوانوں کو ورغلانے کی کوشش کررہے ہیں، کسی کو بلوچستان کا امن سبوتاژ نہیں کرنے دیں گے۔