اقوام متحدہ جنرل اسمبلی سے خطاب کے دوران وزیراعظم نے جذباتی انداز اپنالیا؛ ڈائس پر کتنے مکّے مارے، یہ بات معمہ بن گئی

نیویارک میں اقوام متحدہ کی جنرل اسمبلی کے اجلاس سے خطاب کے دوران وزیراعظم شہباز شریف نے جذباتی انداز اپناتے ہوئے ڈائس پر مکے برسادیے۔

گزشتہ روز خطاب کرتے ہوئے وزیراعظم شہباز شریف نے موسمیاتی تبدیلی کے تباہ کن اثرات پر عالمی برادری کی توجہ دلائی۔

ان کا کہنا تھا کہ پاکستان جیسے ترقی پذیر ممالک ہر سال تباہ کن سیلابوں کا سامنا کرتے ہیں لیکن ان سے کہا جاتا ہے کہ وہ اس نقصان کے ازالے کے لیے مزید قرض لیں، وزیراعظم نے پُرعزم لہجے میں کہا کہ ”یہ کسی صورت انصاف نہیں ہے“۔

انہوں نے سوال اٹھایا کہ آخر کس طرح ایسے ممالک سے توقع کی جاسکتی ہے کہ وہ قرضوں کا بوجھ بڑھائیں جب کہ موسمیاتی بحران پیدا کرنے میں ان کا کوئی کردار نہیں۔

شہباز شریف کا کہنا تھا کہ مزید قرض لینا مسئلے کا حل نہیں بلکہ پاکستان اپنی محنت، جدوجہد اور عوام کی قربانیوں سے ایک عظیم ملک بنے گا۔

خطاب کے دوران جب وزیراعظم نے جذباتی انداز میں ڈائس پر مکے برسائے تو حاضرین نے پرجوش انداز میں تالیاں بجا کر ان کے مؤقف کی حمایت کی۔