"عزت اس طرح بحال نہیں ہوتی”، خواجہ آصف کی مودی پر کڑی تنقید

وفاقی وزیر دفاع خواجہ آصف نے بھارتی وزیراعظم نریندر مودی پر کڑی تنقید کرتے ہوئے کہا ہے کہ عزت اس طرح بحال نہیں ہوتی۔

تفصیلات کے مطابق وزیر دفاع خواجہ آصف نے سماجی رابطے کی ویب سائٹ ایکس پر بھارتی وزیراعظم نریندر مودی کے رویے پر سخت ردعمل دیتے ہوئے کہا ہے کہ مودی نے اپنی سیاست بچانے کے لیے کرکٹ کی روح اور کلچر کو تباہ کردیا ہے۔

کرکٹ کے کلچر اور سپرٹ کو تباہ کر کے مودی اپنی سیاست بچانے کے لئے برصغیر میں امن امکانات اور مسائل کے حل کے کے چانسز ختم کر رہا ھے۔ عزت اسطرح نہیں بحال ھوتی۔ پاک بھارت جنگ کا سکور 6/0 پتھر پہ کندہ engrave ھو گیا ھے۔ ھم تو کچھ نہیں کہہ رہے مودی بھارت میں اور دنیا دونوں میں خوار ھو… https://t.co/jzoYMpErbO

— Khawaja M. Asif (@KhawajaMAsif) September 28, 2025

ان کا کہنا تھا کہ کھیل میں سیاست کو شامل کرنے سے نہ صرف برصغیر میں امن کے امکانات متاثر ہوئے ہیں بلکہ خطے کے مسائل کے حل کے مواقع بھی ختم ہو رہے ہیں۔

انہوں نے کہا کہ عزت اس طرح بحال نہیں ہوتی، تاریخ میں پاک بھارت جنگ کا اسکور چھ صفر کے ساتھ پتھر پر کندہ ہوچکا ہے۔

وفاقی وزیر دفاع نے مزید کہا کہ ہمارے کچھ کہے بغیر بھی دنیا دیکھ رہی ہے کہ مودی بھارت کے اندر اور عالمی سطح پر ذلت و رسوائی کا شکار ہے۔

واضح رہے کہ پاکستانی کھلاڑیوں سے ہاتھ ملانے سے انکار کے بعد بھارتی ٹیم نے ٹرافی بھی ایشین کرکٹ کونسل کے صدر محسن نقوی سے لینے سے انکار کردیا تھا۔

بی سی سی آئی نے اے سی سی کو باضابطہ طور پر فیصلے سے آگاہ کیا جس کے بعد ٹرافی تقریب سے واپس منگوا لی گئی۔