ایس آئی ایف سی کی کوششوں سے زرعی شعبے میں غیر ملکی سرمایہ کاری کا فروغ

اسلام آباد: بیلاروس ٹریکٹر منصوبہ زرعی خودکفالت کی جانب اہم قدم قرار دیا جا رہا ہے۔

ایس آئی ایف سی کی کامیاب کوششوں کے باعث زرعی شعبے میں غیر ملکی سرمایہ کاری کو فروغ حاصل ہوا ہے۔

بیلاروس ٹریکٹرز منصوبے پر حکومت اور نجی سرمایہ کاروں کے درمیان اہم ملاقات ہوئی۔ پاکستان میں 80 ہارس پاور تک بیلاروس ٹریکٹرز مقامی اسمبلی لائن کے ذریعے متعارف کرانے کی تیاری کی جا رہی ہے۔

منصوبے سے زرعی پیداوار میں اضافہ اور مشینری کے اخراجات میں کمی متوقع ہے۔ سی کے ڈی (Completely Knocked Down) پلانٹ کے قیام سے آئندہ پانچ سالوں میں 2,800 بیلاروس ٹریکٹرز کی مقامی ضرورت کو پورا کرنے کا ہدف رکھا گیا ہے۔

وزیراعظم کے معاون خصوصی ہارون اختر نے کہا کہ بیلاروس ٹریکٹر معاہدہ زرعی پیداوار بڑھانے میں معاون ثابت ہوگا۔ صنعتی ماہرین کے مطابق پاکستان اور بیلاروس کا تعاون زرعی شعبے میں جدید مشینی نظام اور پائیدار ترقی کا گیم چینجر ہے۔

ایس آئی ایف سی کی مؤثر حکمت عملی سے زرعی مشینری کی مقامی پیداوار میں اضافہ ہو رہا ہے۔