عالمی برادری فلسطین کے حق میں اپنی ذمہ داریاں پوری کرے، پاکستان کا مطالبہ

اقوام متحدہ کی سلامتی کونسل میں پاکستان نے امریکی صدر ڈونلڈ ٹرمپ کے غزہ منصوبے کو امن قائم کرنے کے لیے ایک نادر موقع قرار دیا۔

اجلاس سے خطاب کرتے ہوئے پاکستان کے مستقل مندوب عاصم افتخار نے کہا کہ اگرچہ غزہ میں امن کی امیدیں تیزی سے ختم ہوتی دکھائی دیتی ہیں، لیکن ساتھ ہی نئی سفارتی راہیں بھی کھل رہی ہیں، جن میں پاکستان فعال کردار ادا کرتا رہے گا۔

انہوں نے اسرائیل کے ای ون بستی منصوبے کو دو ریاستی حل پر براہِ راست حملہ قرار دیتے ہوئے خبردار کیا کہ یہ منصوبہ مشرقی یروشلم کو فلسطین سے کاٹنے اور مغربی کنارے کی جغرافیائی وحدت کو ختم کرنے کی کوشش ہے، جو بین الاقوامی قوانین کی صریح خلاف ورزی ہے۔

پاکستانی مندوب نے اس بات پر زور دیا کہ دو ریاستی حل ہی واحد راستہ ہے، جو 1967 سے پہلے کی سرحدوں اور مشرقی یروشلم کو فلسطین کا دارالحکومت تسلیم کرتے ہوئے ممکن ہو سکتا ہے۔

انہوں نے کہا کہ اس حل کو کمزور کرنے کی کسی بھی کوشش کو قبول نہیں کیا جا سکتا۔

عاصم افتخار نے مطالبہ کیا کہ سلامتی کونسل فوری طور پر ایسی قرارداد منظور کرے جو اسرائیلی بستیوں کو غیر قانونی قرار دے، ان کی توسیع پر پابندی عائد کرے اور شہریوں کے تحفظ کو یقینی بنائے۔

ان کا کہنا تھا کہ عالمی برادری کو ان خلاف ورزیوں پر خاموش نہیں رہنا چاہیے اور تمام رکن ممالک کو اپنی ذمہ داریاں پوری کرتے ہوئے فلسطینی عوام کی حمایت کرنی چاہیے۔

انہوں نے مزید کہا کہ پاکستان فلسطینی عوام کی آزادی، انصاف اور وقار کی جدوجہد میں ان کے ساتھ مکمل یکجہتی کا اظہار کرتا ہے اور مشرق وسطیٰ میں ایک جامع اور منصفانہ امن کے لیے اپنی آواز بلند کرتا رہے گا۔