کراچی میں آج بھی گرج چمک کے ساتھ بارش کا امکان

کراچی: شہر قائد آج بھی شدید گرمی اور حبس کی لپیٹ میں رہے گا۔

محکمہ موسمیات کے مطابق آج شام اور رات کے دوران گرج چمک کے ساتھ درمیانے درجے کی بارش کا امکان ہے۔

محکمہ موسمیات نے بتایا کہ شہر میں سمندری ہوائیں مکمل طور پر بند رہیں گی جس کے باعث گرمی کی شدت میں اضافہ ہوگا، اس وقت شہر کا درجہ حرارت 26 ڈگری سینٹی گریڈ ریکارڈ کیا گیا ہے تاہم گرمی کی شدت 32 ڈگری سینٹی گریڈ تک محسوس کی جارہی ہے۔

محکمہ موسمیات کا کہنا ہے کہ کراچی میں زیادہ سے زیادہ درجہ حرارت 39 ڈگری سینٹی گریڈ تک جاسکتا ہے، شمالی سمت سے 6 کلو میٹر فی گھنٹہ کی رفتار سے ہوائیں چل رہی ہیں۔

دوسری جانب سندھ کے بیشتر اضلاع میں مطلع جزوی ابر آلود رہنے کے ساتھ آندھی اور بارش کا امکان ہے، محکمہ موسمیات نے پیشگوئی کی ہے کہ کل سے کراچی میں درجہ حرارت معمول پر آجائے گا۔