عوامی ایکشن کمیٹی کا پُرتشدد احتجاج؛ حکومت فراخدلی سے مُذاکرات کیلئے تیار

چوہدری انوار الحق نے کہا کہ 3 پولیس کے جوان شہید جبکہ 100سے زائد زخمی ہوئے ہیں، حکومت فراخدلی سے مذاکرات کیلئے تیار ہے۔

وفاقی وزیر طارق فضل چوہدری اور وزیراعظم آزاد کشمیر نے مشترکہ نیوز کانفرنس میں کہا کہ عوامی ایکشن کمیٹی نے پر امن احتجاج کی کال دی تھی، پر امن احتجاج کی بجائے تشدد کا راستہ اختیار کیا گیا۔

انہوں نے کہا کہ مظفرآباد، راولاکوٹ،کوٹلی میں جہاں آپ چاہیں مذاکرات کے لیے تیار ہیں، تشدد کے راستے پر کسی مقصد کا حصول ممکن نہیں، 13 گھنٹے مذاکرات ہوئے، مذاکرات ناکام نہیں تعطل کا شکار ہوئے تھے،

وزیر اعظم کا کہنا تھا کہ انتہائی پرتشدد مظاہروں کے دوران اسکول بھی جلایاگیا، کچھ مطالبات آئینی ترمیم کے بغیر نہیں مانے جاسکتے، عوامی ایکشن کمیٹی کے جائز مطالبات تسلیم کرنے کیلئے تیار ہوں، مسائل کا حل ہمیشہ مذاکرات کے ذریعے ہی نکل سکتا ہے۔

انکا کہنا تھا کہ وزیر اعظم نے مسائل کے حل کیلئے کمیٹی تشکیل دی تھی، عوامی ایکشن کمیٹی سے مطالبات کے حوالے سے مذاکرات کیے گئے، 29ستمبر کو عوامی ایکشن کمیٹی نے پرامن احتجاج کی کال دی تھی۔

انہوں نے مزید کہا کہ عوامی ایکشن کمیٹی کے90 فیصد مطالبات کو تسلیم کرلیا گیا تھا، وزیراعظم نے امیر مقام اور مجھے مذاکرات کی ذمہ داری دی، ہم دونوں وفاقی وزرا نے مطالبات پر عملدرآمد کی گارنٹی دی تھی۔

مقدمات کے خاتمے سمیت معطل سرکاری ملازمین کی بحالی کا حکم نامہ جاری ہوا، گندم، بجلی اور لوکل گورنمنٹ کے حوالے سے مطالبات منظور کیے گئے۔

مہاجرین کی سیٹیں ختم کرنا، وزرا کی تعداد میں کمی پرپیشرفت نہ ہوئی، دونوں مطالبات پرآئین میں ترمیم کی ضرورت تھی، کمیٹی میں طے پایا کہ دونوں مطالبات کوبعد میں حل کیاجائے گا۔

90فیصد مطالبات منظور ہونے کے باوجود احتجاج کی ضرورت نہیں تھی، پرتشدد احتجاج سے کچھ حاصل ہونے والا نہیں، جنت نظیر وادی میں اس طرح کا تشدد کسی مسئلے کاحل نہیں، پرتشدد احتجاج سے قیمتی جانوں کا ضیاع ہوا۔

وزیر اعظم آزاد کشمیر نے کہا کہ عوامی ایکشن کمیٹی کو مذاکرات کی دعوت دیتے ہیں، مہذب دنیا میں مطالبات کی منظوری کا واحد راستہ مذاکرات ہے، قیمتی انسانی جانوں کے ضیاع پر شدید دکھ اور افسوس ہے۔