ممکن ہے آج رات ہم پر حملہ ہوجائے؛ مشتاق احمد کا تشویشناک پیغام

غزہ کے لیے امدادی مشن پر روانہ گلوبل صمود فلوٹیلا اسرائیلی بحریہ کے نشانے پر آ گئی ہے۔

قافلے میں شامل پاکستان کے سابق سینیٹر مشتاق احمد خان نے ایک ویڈیو پیغام میں خدشہ ظاہر کیا ہے کہ آج رات فلوٹیلا پر اسرائیل کی جانب سے حملہ ہو سکتا ہے۔

سماجی رابطے کی ویب سائٹ ایکس (ٹوئٹر) پر جاری کردہ ویڈیو میں مشتاق احمد خان نے کہا کہ اسرائیلی جنگی جہاز دور سے نظر آنا شروع ہو گئے ہیں، جس سے حملے کے امکانات بڑھ گئے ہیں۔

انہوں نے بتایا کہ ہنگامی صورتحال کے باعث سب نے حفاظتی جیکٹس پہن لی ہیں، تاہم فلوٹیلا کا سفر رکے گا نہیں۔

ہم غزہ سے مزید قریب ہو گئے ہیں اور اب ہمیں دور سے اسرائیلی جہاز اپنی جانب آتے دکھائی دے رہے ہیں۔ عین ممکن ہے کہ آج رات ہم پر حملہ کیا جائے۔ میرا موبائل پہلے ہی اسرائیل نے جام کر دیا ہے لہذا اب اس ناکارہ فون کو میں سمندر برد کرتا ہوں۔
آپ سب سے یہی اپیل ہے جو میں گزشتہ ڈیڑھ سال سے… pic.twitter.com/0fHTSzokH4

— Senator Mushtaq Ahmad Khan | سینیٹر مشتاق احمد خان (@SenatorMushtaq) September 30, 2025

مشتاق احمد خان نے دعویٰ کیا کہ اسرائیل نے ان کا موبائل فون جام کر دیا ہے، جس کے باعث وہ گزشتہ 36 گھنٹوں سے کسی سے رابطے میں نہیں ہیں۔

انہوں نے کہا کہ "اسرائیل میرا فون جام کرسکتا ہے مگر غزہ کی طرف ہمارا سفر نہیں روک سکتا۔” اس موقع پر انہوں نے اپنا موبائل سمندر میں پھینک دیا، جس کی ویڈیو بھی سوشل میڈیا پر وائرل ہو رہی ہے۔

سابق سینیٹر نے کہا کہ چاہے ہم سمندر میں مچھلیوں کی خوراک بن جائیں یا اسرائیلی ڈرون کا نشانہ، ہم پیچھے نہیں ہٹیں گے اور غزہ کی طرف سفر جاری رہے گا۔

انہوں نے پاکستانی عوام سے اپیل کی کہ اگر وہ غزہ نہیں جا سکتے تو اسلام آباد میں امریکی سفارتخانے کے سامنے پرامن احتجاج کریں اور فلسطینی عوام سے یکجہتی کا اظہار کریں۔

واضح رہے کہ اس سے قبل اسرائیل نے غزہ کے لیے امداد لے جانے والی کشتیوں میڈلین اور حنظلہ کو بھی روک دیا تھا۔