قطار نہ انتظار!! پاکستانیوں کیلئے نادرا نے بڑا اعلان کر دیا

ملک بھر کے شہریوں کے لیے خوشخبری ہے کہ نادرا دفاتر میں اب طویل قطاروں میں گھنٹوں انتظار کی اذیت ختم ہونے جا رہی ہے۔

 نیشنل ڈیٹابیس اینڈ رجسٹریشن اتھارٹی (نادرا) نے عوام کی سہولت کے لیے ایک نیا نظام متعارف کرایا ہے جس کے تحت شہری پاک آئی ڈی ایپ کے ذریعے گھر بیٹھے اپنی اپائنٹمنٹ حاصل کر سکتے ہیں۔

نادرا کی جانب سے جاری کردہ بیان کے مطابق اب پاکستان کے کسی بھی حصے میں موجود شہری، اپنے قریبی نادرا مرکز پر جانے سے قبل موبائل ایپ کے ذریعے اپائنٹمنٹ بک کر سکتے ہیں۔

مقررہ وقت پر دفتر پہنچنے والے افراد کو ترجیحی بنیادوں پر سروس فراہم کی جائے گی، جس سے انہیں لمبی قطاروں میں لگنے اور وقت ضائع ہونے سے نجات ملے گی۔

نادرا کا کہنا ہے کہ یہ قدم عوامی سہولت کو مدنظر رکھتے ہوئے اٹھایا گیا ہے تاکہ شناختی کارڈ سمیت دیگر دستاویزات کے حصول کا عمل زیادہ مؤثر، آسان اور تیز بنایا جا سکے۔

 واضح رہے کہ نادرا ملک و بیرونِ ملک مقیم پاکستانیوں کو قومی شناختی کارڈ، فیملی رجسٹریشن سرٹیفکیٹ اور دیگر شناختی دستاویزات فراہم کرنے والا واحد مجاز ادارہ ہے۔