عوام کا پیسہ صرف عوام پر خرچ ہوگا، وزیراعلیٰ مریم نواز

لاہور: وزیراعلیٰ پنجاب مریم نواز نے کہا ہے کہ عوام کا پیسہ ہے اور اسے عوام پر ہی خرچ کرنا ہوگا۔

تفصیلات کے مطابق وزیراعلیٰ پنجاب مریم نواز سے نیشنل سیکیورٹی اینڈ وار کورس کے شرکاء اور فیکلٹی ممبران نے ملاقات کی، مریم نواز نے وفد کا خیر مقدم کیا اور ان کے ساتھ مختلف امور پر تبادلہ خیال کیا۔

شرکائے کورس نے وزیراعلیٰ مریم نواز کے عوامی فلاحی منصوبوں کو سراہا۔ اس موقع پر وزیراعلیٰ نے آپریشن بنیان مرصوص کی کامیابی پر مبارکباد پیش کرتے ہوئے فیلڈ مارشل عاصم منیر اور دیگر عسکری قیادت کو خراج تحسین پیش کیا۔

مریم نواز نے کہا کہ حکمران کا ہر فیصلہ براہِ راست عوام کی زندگی پر اثرانداز ہوتا ہے، دنیا میں معاشی اور دفاعی طور پر مضبوط ملک کو عزت کی نگاہ سے دیکھا جاتا ہے، عوام کا پیسہ عوام پر ہی خرچ ہونا چاہیے۔

ان کا کہنا تھا کہ وہ مقامی حکومت کے خلاف نہیں ہیں بلکہ اختیارات کی منتقلی پر یقین رکھتی ہیں۔