عوامی مفاد اور امن ہماری ترجیح ہے، وزیراعظم کا عوامی ایکشن کمیٹی سے معاہدے کا خیرمقدم

وزیر اعظم شہباز شریف نے آزاد کشمیر میں مذاکراتی کمیٹی اور جوائنٹ ایکشن کمیٹی میں معاہدے کا خیر مقدم کیا ہے۔

پرائم منسٹر آفس میڈیا ونگ سے جاری بیان  کے مطابق وزیر اعظم شہباز شریف نے آزاد کشمیر میں مذاکرتی عمل کی کامیابی کا اور حکومتی مذاکراتی کمیٹی و جوائنٹ ایکشن کمیٹی کے درمیان معاہدے کا خیر مقدم  کرتے ہوئے کمیٹی کے اراکین کو خراج تحسین  پیش کیا ہے۔

وزیر اعظم شہباز شریف نے مذاکراتی کمیٹی کے اراکین کی کاوشوں کو سراہا اور شاباش دی، انہوں نے مذاکراتی عمل کو پاکستان اور آزاد جموں و کشمیر کی بڑی کامیابی قرار دیا۔ وزیر اعظم نے جوائنٹ ایکشن کمیٹی کے اراکین کا بھی شکریہ ادا کیا اور امن کے قیام پر مبارکباد دی۔

انہوں نے کہا کہ امن کا قیام اور حالات کا معمول پر آجانا خوش آئند ہے، آخر کار سازشیں اور افواہیں دم توڑ گئیں، تمام معاملات خوش اسلوبی سے حل ہوئے، حکومت اپنے کشمیری بھائیوں کے مسائل کو حل کرنے کیلئے ہر وقت تیار ہے۔

 شہباز شریف نے کہا کہ عوامی مفاد اور امن ہماری ترجیح ہے، آزاد کشمیر کی خدمت کرتے رہیں گے، کشمیری بھائیوں سے گزارش ہے افواہوں پر کان دھرنے سے گریز کریں۔

 وزیر اعظم شہباز شریف نے کہا کہ پہلے بھی کشمیریوں کے حقوق کے محافظ تھے، آئندہ بھی تحفظ کرتے رہیں گے، آزاد کشمیر کے مسائل پر ہمیشہ توجہ رہی ہے، میری حکومت نے ہمیشہ ترجیح بنیادوں پر مسائل کو حل کیا۔