پنجاب بھر میں موسلا دھار بارش جاری، منگلا ڈیم فل ہوگیا، سیلابی صورتحال کا خدشہ

پنجاب کے بیشتر علاقوں میں تیز ہواؤں کے ساتھ بارش کا سلسلہ سے جاری ہے۔

موسم خوشگوار ہونے کے ساتھ شہریوں کی مشکلات میں بھی اضافہ ہوگیا ہے۔ بارش سے منگلا ڈیم بھر گیا جبکہ دریائے ستلج میں بھارت کی جانب سے پانی چھوڑے جانے کا امکان ہے۔

لاہور، اوکاڑہ، کمالیہ، چنیوٹ، چونیاں، ٹوبہ ٹیک سنگھ، بھوآنہ، گوجرہ اور گرد و نواح میں رات گئے موسلا دھار بارش سے نشیبی علاقے زیر آب آگئے۔

لاہور میں ڈیوس روڈ، گڑھی شاہو، مال روڈ، ائیرپورٹ، صدر اور مغل پورہ کے علاقوں میں تیز بارش کے باعث سڑکیں ندی نالوں کا منظر پیش کرنے لگیں۔

گلشن راوی، سمن آباد، چوبرجی اور علامہ اقبال ٹاؤن میں بھی شدید بارش کے باعث بجلی کی فراہمی معطل ہوگئی، کئی فیڈر ٹرپ کر گئے۔

اوکاڑہ، ساہیوال اور قصور میں تیز آندھی کے ساتھ بارش ہوئی، جبکہ کمالیہ، ٹوبہ ٹیک سنگھ اور فیصل آباد میں کہیں ہلکی اور کہیں تیز بارش سے موسم خوشگوار ہوگیا۔

شمالی علاقوں میں موسم سرما نے وقت سے پہلے دستک دے دی ہے۔ استور کے بالائی علاقوں، مینگورہ شہر اور سوات کے سیاحتی مقامات گبین جبہ اور وادی کالام میں بارش کے ساتھ ژالہ باری ہوئی، جبکہ پہاڑوں پر موسم سرما کی پہلی برفباری سے سردی میں نمایاں اضافہ ہوگیا۔

محکمہ موسمیات کی پیشگوئی کے مطابق آج اسلام آباد، پنجاب، خیبر پختونخوا، کشمیر اور گلگت بلتستان میں مزید بارش کا امکان ہے۔

منگلا ڈیم اپنی بلند ترین سطح کے قریب پہنچ گیا ہے اور صرف چند انچ کی گنجائش باقی رہ گئی ہے۔ انتظامیہ کے مطابق اگر مزید بارشیں ہوئیں تو اسپل وے کھولنے پڑیں گے۔

دریائے جہلم کے اطراف رہنے والے مکینوں کو ہائی الرٹ کر دیا گیا ہے۔

ضلعی انتظامیہ نے دریائے جہلم کے کنارے واقع متعدد دیہات کو خالی کرانے کے احکامات جاری کیے ہیں۔ نالہ گھان اور نالہ بنہاں میں طغیانی کا خدشہ ظاہر کیا جا رہا ہے۔

دریائے ستلج میں بھارت کی جانب سے مزید پانی چھوڑنے کا امکان ظاہر کیا جا رہا ہے۔ ڈی جی پی ڈی ایم اے عرفان علی کاٹھیا کے مطابق پنجاب کے مختلف علاقوں میں بارشیں ندی نالوں میں طغیانی کا باعث بن سکتی ہیں۔