وزیراعظم کا پاکستانی معیشت سے متعلق بلوم برگ کی رپورٹ کا خیر مقدم

اسلام آباد: وزیراعظم شہباز شریف نے پاکستانی معیشت کے حوالے سے عالمی جریدے بلوم برگ کی رپورٹ کا خیر مقدم کیا ہے۔

تفصیلات کے مطابق وزیراعظم شہباز شریف نے کہا کہ پاکستان کے کریڈٹ ڈیفالٹ سواپ میں نمایاں کمی آئی ہے اور ڈیفالٹ کے امکانات کم ہوگئے ہیں۔

ان کا کہنا تھا کہ پاکستانی معیشت پر عالمی سرمایہ کاروں کا اعتماد مسلسل بڑھ رہا ہے، جو مثبت معاشی رجحانات کا مظہر ہے۔

انہوں نے بلوم برگ کی رپورٹ کو ملک کے ترقیاتی سفر کی عکاس قرار دیتے ہوئے کہا کہ گزشتہ حکومت کے اختتام پر پاکستان ڈیفالٹ کے دہانے پر کھڑا تھا، تاہم اب حالات میں نمایاں بہتری آئی ہے۔

وزیراعظم کا کہنا تھا کہ ترقی کا یہ سفر کسی صورت نہیں رکے گا اور ملک معاشی استحکام کی طرف گامزن ہے۔