آصف علی زرداری تصادم کی سیاست پر یقین نہیں رکھتے، وزیرِ دفاع

اسلام آباد: وفاقی وزیرِ دفاع خواجہ آصف نے کہا ہے کہ صدر مملکت آصف علی زرداری تصادم کی سیاست پر یقین نہیں رکھتے۔

تفصیلات کے مطابق وفاقی وزیرِ دفاع خواجہ آصف نے اپنے جاری کردہ ایک بیان میں کہا کہ آصف علی زرداری سیاسی کشیدگی کم کرنے میں غیر معمولی مہارت رکھتے ہیں اور تصادم کی سیاست پر یقین نہیں رکھتے۔

انہوں نے محسن نقوی کو آصف زرداری کی دعوت پر کراچی بلانے کو خوش آئند قرار دیا۔

ان کا کہنا تھا کہ ن لیگ اور پیپلز پارٹی دونوں کو محسن نقوی پر مکمل اعتماد ہے اور باہمی رابطوں سے سیاسی استحکام پیدا ہوگا۔

انہوں نے کہا کہ پی ٹی آئی کو پہلے اپنا گھر درست کرنا چاہیے اور دوسروں پر تنقید سے گریز کرنا چاہیے، کیونکہ علی امین گنڈاپور اور علیمہ خان خود ایک دوسرے پر الزامات لگارہے ہیں۔

وزیرِ دفاع نے بتایا کہ وزیراعظم کے ملائیشیا سے واپسی کے بعد اہم معاملات طے پاجائیں گے۔

خواجہ آصف نے کہا کہ سیلاب کے دوران غیر ضروری تنقید کی فضا پیدا کی گئی، مگر حکومت نے حالات کو بہتر انداز میں سنبھالا۔

ان کا مزید کہنا تھا کہ وزیراعلیٰ پنجاب مریم نواز مسلم لیگ (ن) کی مستقبل کی قیادت ہیں اور یقین ظاہر کیا کہ پیپلز پارٹی اور ن لیگ کی قیادت موجودہ سیاسی صورتحال کو بخوبی سنبھال لے گی۔