شناختی کارڈ بنوانے والوں کیلئے بڑی خوشخبری

نادرا کی پاک آئی ڈی موبائل ایپ نے پاکستانی شہریوں کے لیے شناختی دستاویزات کے حصول کے عمل کو جدید اور آسان بنا دیا ہے۔

 اب صارفین کو نادرا کے دفاتر جانے کی ضرورت نہیں بلکہ وہ اپنے اسمارٹ فون کے ذریعے شناختی کارڈ کی درخواست دے سکتے ہیں، ادائیگی کر سکتے ہیں اور درخواست کی پیش رفت کو براہ راست ٹریک کر سکتے ہیں۔

 گزشتہ سہ ماہی میں پاک آئی ڈی کے ذریعے 12 لاکھ سے زائد درخواستیں موصول ہوئیں، جبکہ ڈیجیٹل درخواستوں میں 45 فیصد اضافہ دیکھنے میں آیا ہے۔ اب روزانہ تقریباً 10 ہزار کیسز اسی ایپ کے ذریعے نمٹائے جا رہے ہیں، جو کہ نادرا کے کل کام کا تقریباً دس فیصد ہے۔

پاک آئی ڈی ایپ صارفین کو اپائنٹمنٹ بُک کرنے، قریبی نادرا مرکز کا پتہ لگانے، متوقع انتظار کے اوقات جاننے، مطلوبہ دستاویزات اپ لوڈ کرنے اور شناختی کاغذات کی ڈیجیٹل نقول محفوظ کرنے کی سہولت فراہم کرتی ہے۔

 یہ ایپ پاکستان کے بڑھتے ہوئے ڈیجیٹل پیمنٹ نظام سے بھی منسلک ہے، جہاں صارفین راسٹ، ڈیبٹ اور کریڈٹ کارڈز، ای ایم آئی اور انٹرنیٹ بینکنگ کے ذریعے ادائیگی کر سکتے ہیں۔ پاک آئی ڈی ایپ اردو اور انگریزی دونوں زبانوں میں دستیاب ہے اور اینڈرائیڈ و آئی او ایس صارفین کے لیے تیار کی گئی ہے۔ ایک کروڑ سے زائد ڈاؤن لوڈز اور 4.8 اسٹار ریٹنگ کے ساتھ یہ ایپ پاکستان کی سب سے قابل اعتماد عوامی سروس ایپس میں شمار ہوتی ہے۔

نادرا آئندہ چند ماہ میں گھر بیٹھے بائیومیٹرک تصدیق، مصنوعی ذہانت پر مبنی رہنمائی، ڈیجیٹل شناختی والٹ اور فوری اسمارٹ نوٹیفکیشنز جیسی جدید سہولیات متعارف کروانے کا منصوبہ رکھتا ہے، جو پاکستان کو مکمل ڈیجیٹل شناختی نظام کے قریب لے جائیں گی۔