دیرینہ مسئلہ حل؛ اوورسیز پاکستانیوں کو خوشخبری سنادی گئی

حکومتِ پاکستان نے بیرونِ ملک مقیم پاکستانیوں کے لیے ایک اہم سہولت فراہم کرتے ہوئے دنیا کے مختلف شہروں میں قائم پاکستانی سفارتخانوں میں نادرا (NADRA) کاؤنٹرز کو مکمل طور پر فعال کر دیا ہے۔

 ترجمان نادرا کے مطابق کینیڈا کے شہروں مونٹریال اور وینکوور، اٹلی کے شہر میلان، بحرین کے دارالحکومت منامہ اور اردن کے شہر عمان میں نادرا کے کاؤنٹرز اب مکمل طور پر آپریشنل ہو چکے ہیں۔

ان کاؤنٹرز کے قیام کا مقصد اوورسیز پاکستانیوں کو ان کی رہائش کے قریب شناختی کارڈ (CNIC)، نائیکوپ (NICOP) اور نادرا سے متعلق دیگر اہم خدمات کی فراہمی ہے، تاکہ انہیں ان کاموں کے لیے پاکستان کا سفر نہ کرنا پڑے۔ اب بیرونِ ملک پاکستانی اپنے قریبی سفارتخانے یا قونصل خانے میں جا کر باآسانی یہ سہولیات حاصل کر سکتے ہیں۔

نادرا حکام کا کہنا ہے کہ ان اقدامات سے ہزاروں پاکستانیوں کو فائدہ پہنچے گا اور ان کا قیمتی وقت اور پیسہ دونوں محفوظ رہے گا۔ اوورسیز پاکستانی کمیونٹی کی جانب سے اس اقدام کو خوش آئند قرار دیا گیا ہے، جبکہ مختلف ممالک میں مقیم پاکستانیوں نے نادرا کے اس فیصلے کو سہولت بخش اور وقت کی ضرورت قرار دیا ہے۔

ذرائع کے مطابق نادرا کی جانب سے ان کاؤنٹرز کی توسیع کا عمل بھی جاری ہے اور اٹلی کے دارالحکومت روم میں بھی جلد ایک نیا کاؤنٹر قائم کیا جا رہا ہے تاکہ وہاں موجود پاکستانی کمیونٹی کو بھی یہ سہولت فراہم کی جا سکے۔

نادرا کی یہ کاوش حکومت کی اوورسیز پاکستانیوں سے وابستگی اور ان کے مسائل کے حل میں سنجیدگی کا عملی ثبوت ہے، جس سے بیرون ملک مقیم پاکستانیوں اور ریاست کے درمیان رشتہ مزید مضبوط ہونے کی توقع ہے۔