ڈی آئی خان: پولیس ٹریننگ اسکول پر حملہ، 5 دہشتگرد ہلاک، 6 اہلکار شہید؛ آئی ایس پی آر

آئی ایس پی آر کا کہنا ہے کہ ڈی آئی خان پولیس ٹریننگ سینٹر پر بھارتی اسپانسرڈ خوارجیوں نے حملہ کیا جسے سیکیورٹی اداروں نے ناکام بنادیا۔

پاک فوج کے شعبہ تعلقات عامہ ( آئی ایس پی آر ) کے مطابق ڈی آئی خان پولیس ٹریننگ سینٹر پر بھارتی اسپانسرڈ خوارجیوں نے حملہ کیا جسے سیکیورٹی اداروں نے ناکام بنادیا، حملہ آوروں نے ناکامی پر بارود سے بھری گاڑی گیٹ سے ٹکرادی۔

آئی ایس پی آر کا کہنا ہے کہ پولیس اہلکاروں نے مرکزی دروازے پر 3 خارجیوں کو ہلاک کیا، سیکیورٹی فورسز نے 2 خوارج کو عمارت میں گھیر کر ہلاک کیا، شدید فائرنگ کے تبادلے میں 6 بہادر پولیس اہلکار جام شہادت نوش کرگئے۔

آئی ایس پی آر کے مطابق حملے میں 12 پولیس اہلکار اور ایک شہری بھی زخمی ہوا، خوارج نے اسکول کمپلیکس کی مسجد پر حملہ کرکے مقدس مقام کی بے حرمتی کی، خوارج نے امام مسجد کو بھی سفاکی سے شہید کردیا۔

 آئی ایس پی آر کا کہنا ہے کہ علاقے میں کلیئرنس آپریشن جاری ہے، حملے کے ذمہ داروں کو قانون کے کٹہرے میں لایا جائے گا، سیکیورٹی فورسز بھارتی اسپانسرڈ دہشت گردی کے خاتمے کیلئے پر عزم ہیں، شہداء کی قربانیاں ملکی دفاع کے ہمارے عزم کو مزید تقویت دیتی ہیں۔