پاکستان اور آئی ایم ایف کے درمیان قرض پروگرام پر اسٹاف لیول معاہدہ طے پا گیا

اسلام آباد: پاکستان اور عالمی مالیاتی فنڈ (آئی ایم ایف) کے درمیان قرض پروگرام پر اسٹاف لیول معاہدہ طے پا گیا ہے۔

آئی ایم ایف کے اعلامیے کے مطابق ایگزیکٹو بورڈ کی منظوری کے بعد پاکستان کو 1.2 ارب ڈالر کی قسط جاری کی جائے گی۔

اعلامیے میں کہا گیا ہے کہ آئی ایم ایف کی معاونت سے جاری توسیعی فنڈ سہولت (EFF) کے تحت پاکستان کا اقتصادی پروگرام بتدریج استحکام اور مارکیٹ کے اعتماد کی بحالی کی جانب گامزن ہے۔

آئی ایم ایف کے مطابق مالی سال 2025ء میں پاکستان کا کرنٹ اکاؤنٹ 14 سال بعد پہلی بار سرپلس میں رہا، جبکہ مالی توازن پروگرام ہدف سے بہتر رہا، افراطِ زر قابو میں ہے اور زرمبادلہ کے ذخائر میں بہتری آئی ہے۔

اعلامیے میں کہا گیا کہ حالیہ سیلابوں سے لاکھوں افراد متاثر ہوئے اور ایک ہزار سے زائد اموات ہوئیں، جب کہ فصلوں اور مکانات کو شدید نقصان پہنچا۔

آئی ایم ایف نے زور دیا کہ ماحولیاتی خطرات سے نمٹنے کے لیے جامع اصلاحات اور پالیسیوں پر مسلسل عمل درآمد ناگزیر ہے۔

اعلامیے میں مزید کہا گیا کہ حکومت توانائی کے شعبے کی پائیداری، مالی نظم و ضبط اور ساختی اصلاحات کے ایجنڈے کو آگے بڑھانے کے لیے پرعزم ہے۔