اوساکا ایکسپو 2025 میں پاکستانی پویلین کی دھوم، دو ایوارڈز جیت لیے

اوساکا: اوساکا ایکسپو جاپان 2025 میں پاکستانی پویلین نے شاندار کامیابی حاصل کرتے ہوئے دو بین الاقوامی ایوارڈز جیت لیے۔

پاکستانی پویلین کو بیورو انٹرنیشنل ایکسپوزیشن برانز ایوارڈ اور ایگزیبیٹر آن لائن ایڈیٹرز چوائس ایوارڈ سے نوازا گیا، پاکستانی پویلین کی جدت، ہنر اور ثقافت کو عالمی سطح پر بھرپور پذیرائی حاصل ہوئی۔

پنک سالٹ سے متاثر تخلیقی تھیم "ایک ذرۂ نمک میں پوری کائنات” پر پاکستانی پویلین کو ایڈیٹرز چوائس ایوارڈ ملا۔

53 مربع میٹر کے محدود رقبے پر قائم یہ شاہکار پاکستانی پویلین شرکاء کی توجہ کا خاص مرکز رہا، پاکستانی پویلین کو محض 6 ماہ میں اب تک 17 لاکھ افراد دیکھ چکے ہیں۔

پاکستانی سفیر اور پویلین کے چیف کمشنر عبد الحمید نے اس موقع پر کہا کہ محدود جگہ اور وسائل کے باوجود پاکستان پویلین نے 2 بین الاقوامی ایوارڈز اپنے نام کیے۔

انہوں نے کہا کہ پاکستان اور اس کے عوام کے لیے یہ لمحہ باعثِ فخر ہے، یہ کامیابی پوری ٹیم کی دن رات محنت اور پیشہ ورانہ صلاحیتوں کا نتیجہ ہے، پاکستان کی اس کامیابی میں وفاقی حکومت کی مکمل سرپرستی شامل رہی۔

تخلیقی وژن، قومی جذبے اور مضبوط ٹیم ورک کی بدولت پاکستان نے ایکسپو 2025 میں عالمی سطح پر ممتاز مقام حاصل کیا، ایکسپو 2025 کی کامیابی نے پاکستان کی پہچان کو نئی بلندیوں تک پہنچا دیا ہے۔