مذہبی جماعتوں، سول سوسائٹی، تاجروں نے ہڑتال کی کال مسترد کر دی

پاکستان میں مذہبی جماعتوں، سول سوسائٹی اور تاجر برادری نے جمعے کی ہڑتال کی کال یکسر مسترد کر دی۔

جی ٹی وی نیوز کے مطابق تحریکِ لبیک کی پرتشدد کارروائیوں کی شدید الفاظ میں مذمت کی گئی جبکہ پرتشدد مظاہروں اور غیر ضروری ہڑتالوں کو غیر مناسب قرار دے دیا۔

احتجاج کے لیے وقت اور مقام کا چناؤ انتہائی نامناسب قرار دیا گیا جبکہ ویڈیو پیغامات میں بتایا گیا کہ مطالبات غیر ضروری اور طرزِ احتجاج ناقابلِ قبول ہے۔

تاجر رہنما نے کہا کہ حکومتی پالیسیوں پر بلاجواز اعتراض، روڈ بلاک اور جلاؤ گھیراؤ عوام دشمن عمل ہے، ہڑتال سے ہمارا شدید نقصان ہوتا ہے،

تاجر رہنما عاطف اکرام شیخ کا کہنا تھا کہ ملک کی تاجر برادری کسی ہڑتال کا حصہ نہیں بنے گی۔ تاجر عمر بٹ نے کہا کہ کل تمام کاروباری سرگرمیاں معمول کے مطابق جاری رہیں گی۔

 حافظ امیر حمزہ رافع نے بتایا کہ بھارت کو شکست دینے کے بعد پاکستان ایک ابھرتی ہوئی طاقت بن کر سامنے آیا ہے، بھارت کو پاکستان کا ابھرنا گوارا نہیں۔

غزہ میں امن قائم ہوچکا ہے، ایسے میں ٹی ایل پی کا احتجاج غیر موزوں ہے، غزہ میں بحالی کا عمل شروع ہوچکا، ٹی ایل پی طاقت کے زور پر احتجاج کی کال دے رہی ہے۔

مولانا عبدالمنان نے کہا کہ ٹی ایل پی کی محاذ آرائی ملک کے لیے نقصان دہ اور غیر مناسب ہے، ڈنڈے کے زور پر دباؤ ڈالنا اسلامی یا اخلاقی طور پر درست نہیں ہے۔

 محمد رمضان پیرزادہ نے کہا کہ غزہ میں امن قائم ہوچکا، فلسطینی خوشیاں منا رہے ہیں، ٹی ایل پی احتجاج ختم کرے تاکہ عوام کی مشکلات کم ہوں۔

مولانا حق نواز نے کہا کہ بھارت بزدلانہ حرکتوں کے ذریعے پاکستان میں سازشیں کر رہا ہے، بھارت پاکستان کا امن خراب کرنے کے لیے چند عناصر کو استعمال کر رہا ہے۔

انہوں نے کہا کہ غیر ملکی سازشوں کا شکار بننے والے ہوش کے ناخن لیں، پاکستان کے خلاف کسی بھی سازش کو کامیاب نہیں ہونے دیا جائے گا۔

ضیاءالحق قاسم خان بلوچ نے کہا کہ ٹی ایل پی کا احتجاج اور راستے بلاک کرنا غیر قانونی اور غیر اخلاقی ہے، ہڑتالوں اور احتجاج سے مریضوں اور مسافروں کو شدید مشکلات پیش آتی ہیں۔

غزہ میں جنگ ختم ہو چکی اور فلسطین والے خوش ہیں، ٹی ایل پی احتجاج ختم کرے اور عوامی مسائل بڑھانے سے گریز کرے۔