پاکستان سمیت دنیا بھر میں ہندو برادری آج دیوالی کا تہوار منا رہی ہے

ملک بھر میں ہندو برادری آج روایتی جوش و جذبے اور مذہبی عقیدت کے ساتھ دیوالی کا تہوار منا رہی ہے۔

اس موقع پر مندروں، گھروں اور گلی محلوں کو رنگ برنگی روشنیوں، دیے اور برقی قمقموں سے سجایا گیا ہے، دیوالی کو روشنیوں کا تہوار بھی کہا جاتا ہے، جو اندھیرے پر روشنی اور برائی پر نیکی کی فتح کی علامت ہے۔

ہندو روایات کے مطابق اس دن کو بھگوان رام کے 14 سالہ جلاوطنی کے بعد ایودھیا واپسی کی یاد میں منایا جاتا ہے، رام چندر جی نے اس دن راون کو شکست دی اور اپنی ریاست واپس حاصل کی، اسی خوشی میں ایودھیا کے باسیوں نے اپنے گھروں میں دیے روشن کیے، جو بعد میں ایک مذہبی اور ثقافتی روایت بن گئی۔

اس موقع پر ہندو برادری کے افراد لکشمی دیوی کی پوجا بھی کرتے ہیں جو دولت اور خوشحالی کی دیوی سمجھی جاتی ہیں، لوگ اپنے گھروں کی صفائی اور سجاوٹ کرتے ہیں تاکہ خوش بختی اور برکت ان کے گھروں میں آئے۔

ہندو برادری اپنے عزیزوں اور دوستوں میں مٹھائیاں تقسیم کرتے ہیں اور نیک تمناؤں کا تبادلہ بھی کرتے ہیں۔

بڑی تعداد میں ہندو برادری کے افراد کراچی، حیدرآباد، میرپورخاص، سکھر، لاہور اور راولپنڈی سمیت ملک کے مختلف شہروں میں دیوالی کی تقریبات میں شریک ہیں، مندروں میں چراغاں اور آتشبازی کا اہتمام کیا گیا ہے، جبکہ سیکیورٹی کے سخت انتظامات بھی کیے گئے ہیں تاکہ تہوار پُرامن ماحول میں منایا جا سکے۔

دیوالی کی تقریبات رات گئے تک جاری رہے گی۔