اگر صدام حسین پر مقدمہ چل سکتا ہے تو نیتن یاہو پر کیوں نہیں؟ مولانا فضل الرحمان

جمعیت علمائے اسلام (ف) کے سربراہ مولانا فضل الرحمان نے کہا ہے کہ اگر صدام حسین پر مقدمہ چل سکتا ہے تو نیتن یاہو پر کیوں نہیں؟

تفصیلات کے مطابق بھکر میں جلسے سے خطاب کرتے ہوئے مولانا فضل الرحمان نے کہا کہ فلسطینی اپنی سرزمین کے حق کے لیے جدوجہد کر رہے ہیں، اسلامی دنیا کو مزید انتظار نہیں کرنا چاہیے، اسرائیل کو تسلیم کرنے کی بات دراصل فلسطین کے وجود کی نفی کے مترادف ہے۔

انہوں نے کہا کہ امریکی صدر ٹرمپ نیتن یاہو کے ساتھ کھڑے ہو کر پریس کانفرنس کرتے ہیں، حالانکہ عالمی عدالت انصاف نے نیتن یاہو کو عالمی مجرم قرار دے کر ان کی گرفتاری کا حکم دیا ہے، اگر صدام حسین پر مقدمہ چل سکتا ہے تو نیتن یاہو پر کیوں نہیں؟

ان کا کہنا تھا کہ کہ فتنوں کو روکنا صرف علما کی نہیں بلکہ پوری امت مسلمہ کی ذمہ داری ہے، 70 ہزار سے زائد فلسطینی خواتین، بچے، مرد اور بزرگ شہید ہو چکے ہیں، لیکن عالمی ادارے اور اقوام متحدہ خاموش ہیں۔

مولانا فضل الرحمان نے کہا کہ جب تک فلسطین کے ایک فریق، یعنی حماس، فیصلہ نہیں کرے گی تو دوسروں کو مداخلت کا کوئی حق نہیں۔

جمعیت علمائے اسلام (ف) کے سربراہ نے دوٹوک الفاظ میں کہا کہ مدارس کو نقصان پہنچانے کی کوئی کوشش کامیاب نہیں ہوگی، ہم اپنے مؤقف پر قائم ہیں اور چاہتے ہیں کہ قوم کے بچوں کے لیے بھی ویسا ہی سوچا جائے جیسا ہم اپنے بچوں کے لیے سوچتے ہیں۔