سیلاب کے دوران متاثرین کی مشکلات کو محسوس کیا اور تکلیف دہ مناظر دیکھے، وزیر اعلیٰ پنجاب

دیپالپور: وزیر اعلیٰ پنجاب مریم نواز نے کہا ہے کہ سیلاب کے دوران متاثرین کی مشکلات کو محسوس کیا اور تکلیف دہ مناظر دیکھے۔

تفصیلات کے مطابق وزیر اعلیٰ پنجاب مریم نواز نے دیپالپور میں سیلاب متاثرین میں فلڈ کارڈ تقسیم کرنے کی تقریب سے خطاب کرتے ہوئے کہا کہ حالیہ سیلاب نے پنجاب کو بری طرح متاثر کیا۔

انہوں نے کہا کہ سیلاب کے دوران متاثرین کی مشکلات کو محسوس کیا اور بہت تکلیف دہ مناظر دیکھے، سیلاب کے باعث جانی و مالی نقصان ہوا، تاریخ کے بدترین سیلاب نے پنجاب کو گھیرا ہوا تھا۔

ان کا کہنا تھا کہ سیلاب اور بارشوں سے شہریوں کا جانی و مالی نقصان ہوا، تاہم شکر ہے کہ متاثرین کی اپنے گھروں کو واپسی کا سفر شروع ہو گیا ہے۔

مریم نواز نے کہا کہ تین ہفتے پنجاب کی وزیر اعلیٰ اور کابینہ آرام سے نہیں بیٹھی، جتنی بڑی آفت آئی اتنی ہی بڑی پنجاب حکومت نے خدمت کی۔

وزیر اعلیٰ پنجاب نے بتایا کہ پنجاب حکومت نے 25 لاکھ سیلاب میں پھنسے افراد کو محفوظ مقام پر منتقل کیا، اور یہ احساس نہیں بلکہ فرض ادا کیا گیا،  پنجاب حکومت نے متاثرین کے لیے ریلیف کا کام اپنے پیسے سے کیا، عوام کی عزتِ نفس کا خیال رکھا گیا۔

انہوں نے کہا کہ میری موجودگی میں پنجاب کے عوام کو کوئی میلی آنکھ سے نہیں دیکھ سکتا، دنیا کے سامنے ہاتھ نہیں پھیلایا اور کسی سے پیسہ نہیں مانگا۔

ان کا مزید کہنا تھا کہ حکومت کا پیسہ پنجاب کے کام نہ آئے تو پھر اس کا کیا فائدہ؟ میں نے کرپشن کے تمام راستے بند کر دیے ہیں۔