افغان بستیاں مکمل مسمار کی جائیں گی، شرجیل میمن

کراچی؛ وزیر اطلاعات سندھ شرجیل انعام میمن نے افغان بستیوں کے حوالے سے واضح کیا کہ خالی کی گئی بستیوں کو مکمل طور پر مسمار کیا جائے گا اور کسی کو قبضہ کرنے کی اجازت نہیں دی جائے گی۔ حکومت ان علاقوں کو سرکاری تحویل میں لے گی۔

پریس کانفرنس کرتے ہوئے شرجیل میمن نے کہا کہ پاکستان کی پہلی الیکٹرک وہیکل (ای وی) بس سروس پیپلز پارٹی نے شروع کی۔ انہوں نے بتایا کہ سندھ کے مختلف شہروں میں پیپلز بس سروس پہلے ہی چل رہی ہے، اور رواں سال مزید ای وی بسیں شامل کی جائیں گی۔

شرجیل میمن کا کہنا تھا کہ کراچی کے لیے ڈبل ڈیکر بس سروس بھی اسی سال متعارف کرائی جائے گی۔

ان کا کہنا تھا کہ عوام کو جدید اور آرام دہ سفری سہولیات دینا سندھ حکومت کی ترجیح ہے۔ بلاول بھٹو نے ہدایت دی ہے کہ زیادہ سے زیادہ بسیں سڑکوں پر لائی جائیں تاکہ عوامی مسائل کم ہوں۔

انہوں نے بتایا کہ سندھ حکومت خواتین کے لیے فری ای وی اسکوٹیز فراہم کر رہی ہے۔ یہ اسکوٹی صرف لائسنس یافتہ اور ملازمت پیشہ خواتین کو دی جائے گی۔ اس کے ساتھ ساتھ خواتین کے لیے پنک ٹیکسی سروس بھی شروع کی جا رہی ہے، جس میں خواتین ڈرائیورز موجود ہوں گی۔

شرجیل میمن نے کہا کہ کراچی کی سڑکوں کو بہتر بنانے پر کام جاری ہے۔ ہمیں علم ہے کہ شہری مسائل کا سامنا کر رہے ہیں، لیکن حکومت ان مسائل کو ترجیحی بنیادوں پر حل کر رہی ہے۔ ٹرانسپورٹ ڈیپارٹمنٹ میں جدید مانیٹرنگ سسٹم بھی موجود ہے تاکہ سروس کو مؤثر بنایا جا سکے۔