آزاد کشمیر کے 78ویں یومِ تاسیس پر مظفرآباد میں 21 توپوں کی سلامی

WebDesk

24 اکتوبر, 2025 10:41

مظفرآباد: آزاد جموں و کشمیر کے 78 ویں یومِ تاسیس کے موقع پر دارالحکومت مظفرآباد میں شاندار تقریبات کا انعقاد کیا گیا۔

دن کا آغاز دعائیہ محافل سے ہوا جن میں پاکستان، آزاد کشمیر کی سلامتی اور شہدائے کشمیر کے درجات کی بلندی کے لیے خصوصی دعائیں کی گئیں۔

اس موقع پر پاک فوج کے جوانوں نے 21 توپوں کی سلامی دی جس سے فضا پاکستان اور آزاد کشمیر زندہ باد کے نعروں سے گونج اٹھی۔

یومِ تاسیس کی تقریبات کے موقع پر شہدا کو خراجِ عقیدت پیش کیا گیا اور کشمیری عوام کے عزم و حوصلے کو سراہا گیا، مختلف سرکاری عمارتوں پر قومی اور کشمیری پرچم بھی لہرائے گئے۔