دشمن کی جارحیت کیخلاف پاک فوج، عوام سیسہ پلائی دیوار ثابت ہوں گے، ڈی جی آئی ایس پی آر

مردان: ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ دشمن کی جارحیت کیخلاف پاک فوج، عوام سیسہ پلائی دیوار ثابت ہوں گے۔

پاک فوج کے شعبہ تعلقات عامہ (آئی ایس پی آر) کے سربراہ لیفٹیننٹ جنرل احمد شریف چوہدری نے مردان کی مختلف جامعات اور مدارس کے اساتذہ و طلبہ سے خصوصی ملاقات میں قومی سلامتی، پاک افغان کشیدگی اور سوشل میڈیا پر ملک دشمن پروپیگنڈے سے متعلق تفصیلی گفتگو کی۔

ملاقات میں عبد الولی خان یونیورسٹی، وومن یونیورسٹی، یونیورسٹی آف انجینئرنگ اینڈ ٹیکنالوجی اور مختلف مدارس کے اساتذہ و طلبہ نے شرکت کی۔

لیفٹیننٹ جنرل احمد شریف چوہدری نے اپنے خطاب میں کہا کہ پاکستان نے دہشت گردی اور خوارج کے خلاف مؤثر اقدامات کیے ہیں، دشمن کی کسی بھی جارحیت کے خلاف پاک فوج اور عوام سیسہ پلائی ہوئی دیوار بن کر کھڑے ہیں۔

طلبہ و اساتذہ نے غازیان اور شہداء کو زبردست خراجِ تحسین پیش کرتے ہوئے کہا کہ ڈی جی آئی ایس پی آر کی گفتگو سے افواجِ پاکستان کے کردار سے متعلق کئی ابہام دور ہوگئے ہیں۔

اساتذہ نے کہا کہ قوم امن کی کاوشوں اور ملکی ترقی میں پاک فوج کے کردار کو قدر کی نگاہ سے دیکھتی ہے، جبکہ طلبہ نے عزم کیا کہ خیبر پختونخوا کے نوجوان ملکی سلامتی اور استحکام کے لیے پاک فوج کے شانہ بشانہ کھڑے ہیں۔

طلبہ نے کہا کہ ہمیں اس ملاقات کے ذریعے آگاہی ملی کہ کس طرح ملک دشمن عناصر سوشل میڈیا پر افواج پاکستان کے خلاف پروپیگنڈا کرتے ہیں۔

ان کا مزید کہنا تھا کہ افواجِ پاکستان نے ملک کو درپیش خطرات کے خاتمے کے لیے بے پناہ قربانیاں دی ہیں، اب ہماری ذمہ داری ہے کہ ہم اپنی فوج کے ساتھ کندھے سے کندھا ملا کر کھڑے ہوں۔