آزاد کشمیر میں نئی حکومت کا قیام، پارٹی پوزیشن کیا کہتی ہے؟

پاکستان پیپلز پارٹی نے وفاقی حکومت کے خلاف جاتے ہوئے آزاد کشمیر میں حکومت کی تبدیلی کے لیے وزیراعظم کے خلاف عدم اعتماد لانے کا فیصلہ کرلیا۔

اہم معاملے کی منظوری صدر آصف علی زرداری کی زیر صدارت اجلاس میں گزشتہ روز دی گئی۔

آزاد کشمیر کی آئین ساز اسمبلی میں حکومت سازی کے لیے صدر آصف علی زرداری نے وزیر اعظم شہباز شریف سے رابطہ کیا جس پر وزیراعظم شہبازشریف نے مسلم لیگ آزاد کشمیر  کی اموری کمیٹی کو پیپلز پارٹی سے مذاکرات کا ٹاسک سونپ دیا۔

آزاد کشمیر میں حکومت سازی کے لیے پیپلز پارٹی کو 27 ارکان کی حمایت درکار ہوگی اس وقت پیپلزپارٹی کے اسمبلی میں موجود ارکان کی تعداد 17 ہے۔ مسلم لیگ ن اس وقت 9 ارکان اسمبلی کے ساتھ ایوان میں موجود ہے جبکہ پاکستان تحریک انصاف کے ارکان کی تعداد 4 ہے۔

مسلم کانفرنس اور جموں کشمیر پیپلز پارٹی ایک ایک رکن کے ساتھ ایوان میں موجود ہیں جبکہ فارورڈ بلاک میں 20 ارکان شامل ہیں۔ مسلم لیگ ن کی حمایت سے پیپلز پارٹی کے پاس ارکان کی مجموعی تعداد 26 ہوجائے گی۔

مسلم لیگ ن آزاد کشمیر کے صدر شاہ غلام قادر نے اپوزیشن میں بیٹھنے کااعلان کر رکھا ہے جبکہ سابق وزیراعظم آزاد کشمیر راجا فاروق حیدر نے بھی کہا ہے کہ ن لیگ آزاد کشمیر میں حکومت سازی کا حصہ نہیں بنے گی، ہم اپوزیشن بینچز پر بیٹھیں گے۔

ذرائع کا کہنا ہے کہ مسلم لیگ ن اگر حمایت نہیں کرتی تو فارورڈ بلاک کے اراکین کی اہمیت بڑھ جائے گی، پیپلز پارٹی نے نمبر گیم پوری کرنے کیلیے فارورڈ بلاک کے ارکان رابطے تیز کر دیے۔

آنے والے دنوں میں اہم سیاسی پیش رفت کا امکان ہے تاہم پیپلز پارٹی نے اب تک حکومت سازی کے لیے ارکان کی مطلوبہ تعداد ظاہر نہیں کی۔