بھارت کو پاکستان کے خلاف افغان طالبان رجیم کی حمایت مہنگی پڑگئی

بھارت کو پاکستان کے خلاف افغان طالبان رجیم کی حمایت مہنگی پڑگئی۔

خطے میں عدم استحکام کیلئے افغانستان میں دہشت گرد تنظیموں کی حمایت پر بھارت کو شدید ردعمل کا سامنا کرنا پڑ رہاہے۔ بھارت کو سرحد پار دہشت گردی اور طالبان نواز پالیسیوں پر ہزیمت کا سامنا ہے۔

افغانستان کی مسلح تنظیم نیشنل موبلائزیشن فرنٹ نے بھارت کو طالبان کی حمایت پر سخت انتباہ جاری کردیا۔

نیشنل موبلائزیشن فرنٹ نے کہا گیا ہے کہ بھارت کو دوسری بار متنبہ کیا جاتا ہے کہ افغانستان میں طالبان اور دیگر دہشت گرد گروہوں کی حمایت بند کرے۔

این ایم ایف کے مطابق افغانستان میں معصوم لوگوں کے قاتل طالبان کی حمایت بھارت کے دوغلے رویے کو ظاہر کرتی ہے، دنیا میں جمہوریت کا دعوے دار بھارت دہشت گردوں کو سہارا دینے میں ملوث ہے۔

نوٹس کے مطابق کابل میں اپنا سفارت خانہ دوبارہ کھولنا طالبان کو مضبوط کرنے کے مترادف ہے کیا ہندوستان طالبان کے جرائم کو نظر انداز کرتے ہوئے اپنے ہی ملک میں انتشار پھیلانے کا سبب بننا چاہتا ہے؟

اگر بھارت حمایت جاری رکھے گا تو طالبان افغانستان کے ساتھ ہندوستان کو بھی اپنے ہدف میں شامل کریں گے،  یہ بھی کہا گیا کہ افغان آزادی پسند تحریکیں بھارت میں خالصتان کی تحریک سے بھی مکمل تعاون بحال کریں گی۔ بھارت کی طالبان سے حمایت ان تحریکوں کے اتحاد کا باعث بنے گی۔

نیشنل موبلائزیشن فرنٹ نے کہا کہ بھارت فوری طور پر طالبان، داعش اور ٹی ٹی پی جیسے گروہوں سے اپنے تعلقات منقطع کرے، اگر فیصلہ واپس نہ لیا گیا تو آنے والے تمام منفی نتائج کی ذمے داری بھارت پر عائد ہوگی۔