محسن نقوی کی برطانوی ہائی کمشنر اور قائم مقام امریکی سفیر سے علیحدہ ملاقاتیں

وفاقی وزیر داخلہ محسن نقوی سے برطانوی ہائی کمشنر اور قائم مقام امریکی سفیر نے علیحدہ علیحدہ اہم ملاقاتیں کی ہیں۔

ترجمان کے مطابق ان ملاقاتوں میں دو طرفہ تعلقات اور خطے کی مجموعی صورت حال سمیت باہمی دلچسپی کے امور پر تبادلہ خیال کیاگیا۔

وفاقی وزیر داخلہ محسن نقوی کے مطابق ملاقاتوں میں انسداد منشیات، انسانی اسمگلنگ اور سیکیورٹی کے شعبوں میں تعاون بڑھانے پر بھی گفتگوکی گئی۔

وزیرداخلہ نے 5 سال بعد برطانیہ کے لیے فضائی آپریشن کے آغاز پر برطانوی حکومت اور ہائی کمشنر جین میریٹ سے اظہار تشکرکیا۔

اس موقع پر برطانوی ہائی کمشنر اور قائم مقام امریکی سفیر نے منشیات کے خلاف پاک بحریہ کے حالیہ آپریشن کو سراہا۔

برطانوی ہائی کمشنر نے وزیر داخلہ کو برطانوی نیشنل کرائم ایجنسی کے ڈائریکٹر جنرل کے آئندہ ماہ دورہ پاکستان کے متعلق آگاہ کیا،‎ نیشنل کرائم ایجنسی کے ڈائریکٹر جنرل پاکستان کے دورے میں امیگریشن اور انسدادِ منشیات کے شعبوں میں مفاہمتی یادداشتوں پر دستخط کریں گے۔

وزیر داخلہ کے مطابق برطانوی ہائی کمیشن کے تعاون سے سینٹر آف ایکسیلنس جیسے منصوبے پاکستانی اداروں کی استعدادکار بڑھانے میں معاون ثابت ہوں گے،‎ سینٹر آف ایکسیلنس کے قیام سے پاکستان اور برطانیہ کے درمیان باہمی قانونی مشاورت اور بےدخل کیےجانے والے افراد کے معاملات میں تعاون مزید مضبوط ہوگا۔