پنجاب نے آٹے کی فراہمی پر کوئی پابندی نہیں لگائی، الزامات بے بنیاد ہیں: عظمیٰ بخاری

لاہور: صوبائی وزیر اطلاعات پنجاب عظمیٰ بخاری نے کہا ہے کہ پنجاب حکومت نے آٹے یا گندم کی فراہمی پر کوئی پابندی عائد نہیں کی، اس حوالے سے پھیلائی جانے والی تمام خبریں بے بنیاد اور گمراہ کن ہیں۔

عظمیٰ بخاری نے اپنے جاری کردہ ایک بیان میں کہا کہ وزیر اعلیٰ مریم نواز کی ہدایت پر صوبے بھر میں آٹے کی دستیابی اور مناسب قیمت کو یقینی بنایا گیا ہے، پنجاب حکومت عوام دوست پالیسیوں پر عمل پیرا ہے، مگر یہ طرزِ حکمرانی بعض حلقوں کو ہضم نہیں ہو رہا۔

انہوں نے کہا کہ خیبر پختونخوا حکومت کو اپنی ذخیرہ شدہ گندم جاری کرنی چاہیے یا پاسکو سے خریداری کرنی چاہیے، کیونکہ پنجاب اپنے عوام کا حق سیاسی تماشوں پر قربان نہیں کرے گا۔

وزیر اطلاعات نے دعویٰ کیا کہ خیبرپختونخوا میں 200 سے زائد فلور ملز بند ہیں، لہٰذا وہاں کے وزیر اعلیٰ کو احتجاج کے بجائے اپنی فلور ملز چلانے پر توجہ دینی چاہیے۔

ان کا کہنا تھا کہ پنجاب حکومت ٹیکس دہندگان کے پیسے سے گندم خرید کر آٹے کی قیمت مستحکم رکھتی ہے، تاکہ عام شہری متاثر نہ ہو۔

عظمیٰ بخاری نے کہا کہ گندم اور آٹے کی بین الصوبائی ترسیل پر کوئی پابندی نہیں، البتہ ذخیرہ اندوزی کی روک تھام کے لیے اجازت نامہ اور ڈیجیٹل ریکارڈ لازمی قرار دیا گیا ہے۔

انہوں نے بتایا کہ فلور ملز کو 3,000 روپے فی من کے حساب سے گندم فراہم کی جا رہی ہے، اور آٹے کی مسلسل دستیابی و قیمتوں کا استحکام پنجاب حکومت کی اولین ترجیح ہے۔

ان کا مزید کہنا تھا کہ سیاسی نعرے عوام کے چولہے نہیں جلا سکتے، عوامی خدمت ہی اصل سیاست ہے۔