ٹی ایل پی نے پی ٹی آئی دور میں بھی معاہدہ توڑا جس سے قیمتی جانیں ضائع ہوئیں، وزیرِ اطلاعات

اسلام آباد: وفاقی وزیرِ اطلاعات عطاء اللہ تارڑ نے کہا ہے کہ کالعدم ٹی ایل پی نے پی ٹی آئی دورِ حکومت میں بھی معاہدے کی خلاف ورزی کی تھی، جس سے کئی قیمتی جانیں ضائع ہوئیں۔

وفاقی وزیرِ اطلاعات عطاء اللہ تارڑ نے پریس کانفرنس کرتے ہوئے کہا کہ حکومت سیلاب متاثرہ علاقوں میں بہترین ریلیف اور بحالی کے اقدامات کر رہی ہے، جبکہ متاثرہ علاقوں میں نقصانات کا تخمینہ لگایا جا رہا ہے۔

انہوں نے کہا کہ بانی پی ٹی آئی کے خلاف 190 ملین پاؤنڈ کا کیس زیرِ تفتیش ہے، لیکن جب ان سے جواب مانگا جاتا ہے تو وہ ریاستِ مدینہ کی باتوں میں پناہ لینے کی کوشش کرتے ہیں۔

وزیرِ اطلاعات نے سوال اٹھایا کہ ملک ریاض کو اتنی بڑی رعایت کیوں دی گئی؟ یہ قوم کا پیسہ تھا جس کا حساب دینا ہوگا۔

ان کا کہنا تھا کہ ستھرا پنجاب جیسے فلاحی منصوبے کامیابی سے جاری ہیں، جبکہ انہوں نے تنقید کرتے ہوئے کہا کہ تصویروں کی صفائی یا جیل کے باہر احتجاج وزیراعلیٰ کا کام نہیں۔

وفاقی وزیرِ اطلاعات نے انکشاف کیا کہ پنجاب حکومت کو کالعدم ٹی ایل پی کے خلاف خاطرخواہ مواد ملا ہے، کالعدم تنظیم کے دہشت پھیلانے کے شواہد موجود ہیں، اور مرید کے میں شہید ایس ایچ او کو 21 گولیاں ماری گئیں۔

انہوں نے مزید کہا کہ کالعدم ٹی ایل پی نے پی ٹی آئی دورِ حکومت میں بھی معاہدے کی خلاف ورزی کی تھی، جس کے باعث کئی قیمتی جانیں ضائع ہوئیں۔