گاڑی اور موٹر سائیکل مالکان ہوجائیں ہوشیار!! اہم خبر آگئی

شہرِ قائد میں ٹریفک قوانین کی خلاف ورزیوں کے خلاف فیس لیس ای ٹکٹنگ سسٹم کے آغاز کی تاریخ قریب آ گئی ہے۔

 ڈی آئی جی ٹریفک پولیس پیر محمد شاہ نے اس حوالے سے اہم اعلان کیا ہے کہ کراچی میں یکم اکتوبر سے مینوئل جرمانوں پر پابندی لگا دی گئی تھی۔ ان کا کہنا تھا کہ اگر مینوئل چالان کا سلسلہ جاری رہتا، تو رواں سال میں جرمانوں کی مجموعی رقم ایک ارب 10 کروڑ روپے سے تجاوز کر جاتی۔

پیر محمد شاہ نے کہا کہ یکم اکتوبر کے بعد سے کراچی میں کسی بھی شہری کا جرمانہ نہیں کیا گیا۔ تاہم، 27 اکتوبر سے فیس لیس ای ٹکٹنگ سسٹم باضابطہ طور پر شروع کر دیا جائے گا، جس سے شہریوں کو ٹریفک خلاف ورزیوں پر جرمانے کا سامنا بغیر کسی فیس یا اضافی چارجز کے کرنا پڑے گا۔ اس نئے سسٹم کا مقصد شہریوں کی سہولت، شفافیت اور ڈیجیٹل نگرانی کو مزید بہتر بنانا ہے۔

ڈی آئی جی ٹریفک پولیس کے مطابق جنوری سے یکم اکتوبر تک 12 لاکھ 4 ہزار 14 چالان کیے گئے ہیں، جبکہ 3 ہزار 370 افراد کو مختلف ٹریفک خلاف ورزیوں پر گرفتار کیا گیا۔ اس کے علاوہ 3 ہزار 165 گاڑیاں جو ان فٹ حالت میں چل رہی تھیں، ان کے خلاف کارروائی کی گئی۔ غیر قانونی پارکنگ اور انکروچمنٹ کے خلاف 1 ہزار 67 گرفتاریاں عمل میں آئیں۔

غفلت سے گاڑی چلانے اور سڑکوں کی خلاف ورزی کرنے والے 399 افراد کو دفعہ 144 کے تحت گرفتار کیا گیا، جبکہ ممنوعہ سڑکوں پر گاڑی چلانے پر 1 ہزار 180 ڈرائیوروں کے خلاف کارروائی کی گئی۔

پیر محمد شاہ نے کہا کہ یہ فیس لیس ای ٹکٹنگ سسٹم کراچی میں ٹریفک کے نظام میں ایک نیا باب کھولے گا، جس کے ذریعے شہری بغیر کسی پریشانی کے ٹریفک قوانین کی پابندی کریں گے۔