وزیر اعلیٰ پنجاب کا 65 ہزار مساجد کے پیش امام کیلئے وظیفہ مقرر کرنے کا فیصلہ

پنجاب کی وزیر اعلیٰ مریم نواز نے صوبے کی مساجد کے پیش اماموں کے لیے بڑا اعلان کیا ہے۔

حکومت پنجاب نے فیصلہ کیا ہے کہ 65  ہزار مساجد کے پیش اماموں کو باقاعدہ وظیفہ دیا جائے گا۔ یہ فیصلہ وزیر اعلیٰ کی زیرِ صدارت امن و امان سے متعلق مسلسل پانچویں اجلاس میں کیا گیا۔

مریم نواز نے کہا کہ امامِ مسجد معاشرے کے قابلِ احترام اور باعزت افراد ہیں۔ انہوں نے اس بات پر زور دیا کہ محلوں میں چندہ جمع کرکے امام مسجد کو ادائیگی کرنا مناسب عمل نہیں۔

وزیر اعلیٰ نے واضح کیا کہ حکومت پنجاب امام مساجد کی بنیادی ضروریات کے لیے ان کی مالی مدد کرے گی۔

اجلاس کے دوران مریم نواز نے مساجد کی تعمیر و مرمت کے منصوبوں کو سالانہ ترقیاتی پروگرام میں شامل کرنے کی ہدایت دی۔

انہوں نے کہا کہ ان منصوبوں کو جلد مکمل کیا جائے تاکہ مساجد بہتر حالت میں عوام کے استعمال کے لیے دستیاب رہیں۔

وزیر اعلیٰ کی ہدایت پر رائیونڈ تبلیغی اجتماع کے لیے سڑکوں کی تعمیر و مرمت مکمل کر لی گئی ہے۔ رائیونڈ کی سڑکوں پر گڑھے بھر دیے گئے ہیں اور اجتماع کے دوران آمد و رفت کے لیے خصوصی بسیں بھی چلائی جائیں گی۔

مریم نواز نے انتظامیہ کو ہدایت دی کہ اجتماع کے موقع پر سیکیورٹی کے سخت انتظامات کیے جائیں تاکہ شرکاء کو کسی مشکل کا سامنا نہ ہو۔

مریم نواز نے مزید ہدایت دی کہ ڈپٹی کمشنرز اور اسسٹنٹ کمشنرز خود امام مساجد سے ملاقات کریں اور ان کے مسائل سنیں۔ اس کے ساتھ ہی پنجاب میں سائبر کرائم سیل تشکیل دینے کا اصولی فیصلہ بھی کیا گیا تاکہ آن لائن مذہبی انتہاپسندی اور نفرت انگیز مواد پر قابو پایا جا سکے۔

وزیر اعلیٰ نے لاؤڈ اسپیکر کے غیر قانونی استعمال کے خلاف کارروائی یقینی بنانے کی ہدایت بھی دی۔

مذہبی حلقوں کی جانب سے حکومت پنجاب کے ان اقدامات کو خوش آئند اور قابلِ تحسین قرار دیا جا رہا ہے۔