بھارت کی ہٹ دھرمی خطے کے امن کیلئے خطرہ بن چکی ہے، اسحاق ڈار

اسلام آباد: یومِ سیاہ کشمیر کے موقع پر نائب وزیرِ اعظم و وزیرِ خارجہ اسحاق ڈار نے کہا ہے کہ بھارت کی ہٹ دھرمی خطے کے امن کیلئے خطرہ بن چکی ہے۔

 اسحاق ڈار نے اپنے پیغام میں کہا ہے کہ 27 اکتوبر 1947 کشمیر کی تاریخ کا سیاہ ترین دن ہے، جب بھارت نے عالمی قوانین کی خلاف ورزی کرتے ہوئے سری نگر پر غیر قانونی قبضہ کیا۔

انہوں نے کہا کہ گزشتہ 78 برسوں سے کشمیری عوام بھارتی ظلم و جبر، جبری گرفتاریوں اور انسانی حقوق کی پامالیوں کا سامنا کر رہے ہیں، کشمیر کے مستقبل کا فیصلہ اقوامِ متحدہ کی قراردادوں کے مطابق آزادانہ رائے شماری سے ہی ممکن ہے۔

ان کا کہنا تھا کہ بھارت نے سلامتی کونسل کی قراردادوں کی کھلی خلاف ورزی کرتے ہوئے یکطرفہ اقدامات کیے، جس سے مقبوضہ کشمیر میں انسانی حقوق کی سنگین پامالیاں جاری ہیں، سیاہ قوانین، آبادیاتی تبدیلی اور کشمیری قیادت کی جبری گرفتاری بھارت کے سیاسی ایجنڈے کا حصہ ہیں۔

اسحاق ڈار نے کہا کہ بھارتی اقدامات نہ صرف جنیوا کنونشن بلکہ اقوامِ متحدہ کے چارٹر کی بھی خلاف ورزی ہیں، پہلگام حملے کے بعد ہزاروں کشمیریوں کو بلاجواز گرفتار کیا گیا، جبکہ معصوم شہریوں کے گھروں کی مسماری بھارتی بربریت کی تازہ مثال ہے۔

نائب وزیرِ اعظم کا کہنا تھا کہ اقوامِ متحدہ اور دیگر عالمی تنظیمیں متعدد بار بھارتی مظالم کی نشاندہی کر چکی ہیں، تاہم عالمی برادری کو اب تنازعِ کشمیر کے پُرامن حل کے لیے عملی کردار ادا کرنا ہوگا۔

انہوں نے کہا کہ کشمیری عوام کا عزم، حوصلہ اور جدوجہد قابلِ تحسین ہے، ان کی حقِ خودارادیت کی تحریک اٹل اور ناقابلِ شکست ہے۔

ان کا کہنا تھا کہ بھارتی ہٹ دھرمی جنوبی ایشیا کے امن کے لیے سنگین خطرہ بن چکی ہے، اور اس تنازع کا فوری و منصفانہ حل ہی خطے کے استحکام کی ضمانت ہے۔

اسحاق ڈار نے مزید کہا کہ پاکستان کشمیری عوام کی سیاسی، اخلاقی اور سفارتی حمایت جاری رکھے گا، اور ہر عالمی فورم پر ان کی آواز بلند کرتا رہے گا۔