مولانا فضل الرحمان سے بلاول بھٹو کی ملاقات؛ اندرونی کہانی سامنے آگئی

چیئرمین پیپلز پارٹی بلاول بھٹو زرداری نے جمعیت علمائے اسلام (ف) کے سربراہ مولانا فضل الرحمان سے ملاقات کی۔

ذرائع کے مطابق ملاقات میں آزاد جموں و کشمیر کی سیاسی صورتحال پر تفصیلی تبادلہ خیال کیا گیا جبکہ بلاول بھٹو نے مولانا فضل الرحمان کو حالیہ سیاسی حالات پر اعتماد میں لیا۔

ذرائع کا کہنا ہے کہ ملاقات میں افغانستان کی صورتحال اور مسئلہ فلسطین بھی زیر غور آئے۔

مولانا فضل الرحمان نے زور دیا کہ افغانستان کے حالات کو افہام و تفہیم کے ذریعے حل کیا جانا چاہیے۔

انہوں نے کہا کہ خطے میں امن صرف بات چیت اور باہمی احترام سے ممکن ہے۔

ملاقات میں ملک کی مجموعی سیاسی اور امن و امان کی صورتحال پر بھی گفتگو ہوئی۔

ذرائع کے مطابق دونوں رہنماؤں نے پارلیمانی امور، قومی اسمبلی اور سینیٹ میں ورکنگ ریلیشن شپ پر بھی بات چیت کی۔

مولانا فضل الرحمان نے کہا کہ پارلیمانی جمہوریت میں سب سے اہم کردار خود پارلیمنٹ کا ہوتا ہے، جو اس وقت مؤثر انداز میں ادا نہیں ہو رہا۔

ملاقات کے دوران دونوں رہنماؤں کے درمیان متوقع قانون سازی اور دیگر اہم امور پر طویل مشاورت بھی ہوئی۔

ذرائع کے مطابق بلاول بھٹو نے کہا کہ افغانستان سے متعلق جو تجاویز اور خدشات سامنے آئے ہیں، وہ صدرِ مملکت تک پہنچائے جائیں گے۔

یہ ملاقات ملکی سیاست میں اہم پیش رفت قرار دی جا رہی ہے، جس سے مستقبل میں اپوزیشن جماعتوں کے درمیان رابطے مزید مضبوط ہونے کی توقع ہے۔