27 اکتوبر: آج کشمیر کی تاریخ کا سیاہ ترین دن منایا جا رہا ہے

مقبوضہ کشمیر پر بھارتی غاصبانہ قبضے کو 78 سال مکمل ہو گئے، کشمیری عوام آج بھی 27 اکتوبر کو یومِ سیاہ کے طور پر مناتے ہیں تاکہ دنیا کو بھارت کے غیر قانونی قبضے اور انسانی حقوق کی سنگین خلاف ورزیوں سے آگاہ کیا جا سکے۔

تاریخی پس منظر کے مطابق 27 اکتوبر 1947 کو بھارتی افواج نے بغیر کسی آئینی اور اخلاقی جواز کے سری نگر پر قبضہ کیا، حالانکہ تقسیمِ ہند کے وقت کشمیر کی مقامی قیادت نے پاکستان کے ساتھ الحاق کا فیصلہ کیا تھا, مہاراجہ ہری سنگھ نے بھارت سے فوجی مدد کے بدلے غیر قانونی طور پر الحاق کا اعلان کیا، جس کے بعد وادی میں بھارتی تسلط قائم کیا گیا۔

رپورٹس کے مطابق بھارت نے مسلم اکثریتی وادی میں تقریباً 10 لاکھ فوجی تعینات کر رکھے ہیں، اور گزشتہ 78 سالوں میں کشمیری عوام بدترین ظلم و جبر، محاصرے اور انسانی حقوق کی پامالی کا سامنا کر رہے ہیں۔

اعداد و شمار کے مطابق بھارتی فورسز اب تک دو لاکھ سے زائد کشمیریوں کو شہید کر چکی ہیں، ایک لاکھ سے زائد بچے یتیم ہو چکے ہیں جبکہ ہزاروں خواتین زیادتی اور بدسلوکی کا نشانہ بنی ہیں، مزید برآں، ایک لاکھ 70 ہزار سے زائد کشمیری گرفتار کیے جا چکے ہیں اور ایک لاکھ سے زائد مکانات تباہ کر دیے گئے۔

5 اگست 2019 کو بھارت نے آئین کے آرٹیکل 370 منسوخ کر کے کشمیر کی خصوصی حیثیت ختم کر دی، جس کے بعد وادی میں انٹرنیٹ بندش اور کرفیو کی طویل ترین پابندی عائد کی گئی۔

ہیومن رائٹس واچ کے مطابق مقبوضہ کشمیر میں بی جے پی حکومت براہِ راست مظالم میں ملوث ہے، جبکہ جینوسائیڈ واچ پہلے ہی دنیا کو مسلمانوں کی ممکنہ نسل کشی سے خبردار کر چکی ہے۔ ایمنسٹی انٹرنیشنل نے بھی فروری 2023 میں مسلم اکثریتی علاقوں کی مسماری کو انسانی حقوق کی کھلی خلاف ورزی قرار دیا۔

اقوام متحدہ کی جانب سے اب تک کشمیر کے حقِ خودارادیت پر پانچ قراردادیں منظور کی جا چکی ہیں، تاہم کسی ایک پر بھی عملدرآمد نہیں ہو سکا۔

پاکستان میں آج یومِ سیاہ کشمیر اس عزم کے ساتھ منایا جا رہا ہے کہ کشمیری عوام کی آزادی کی جدوجہد میں پاکستان ان کے ساتھ کھڑا ہے، اور دنیا کو بھارت کے مظالم اور غیر قانونی قبضے کے خلاف مؤثر کردار ادا کرنا چاہیے۔