گاڑی مالکان کیلئے بڑی خبر آگئی؛ حکومت کا اہم فیصلہ

ادارہ تحفظ ماحول پنجاب نے فیصلہ کیا ہے کہ 15 نومبر 2025 کے بعد پنجاب بھر میں وہ گاڑیاں جو ایگزاسٹ ٹیسٹنگ سرٹیفکیٹ یا گرین اسٹیکر حاصل نہیں کریں گی، ان کو فوراً قبضے میں لے لیا جائے گا۔

ڈی جی ماحولیات ڈاکٹر عمران حامد شیخ نے کہا کہ لاہور میں ایگزاسٹ ٹیسٹنگ کو لازمی قرار دے دیا گیا ہے۔ اس کا مقصد ان گاڑیوں کو سڑکوں پر چلنے سے روکنا ہے جو فضائی آلودگی کا سبب بن رہی ہیں۔

 انہوں نے کہا کہ 15 نومبر کے بعد اگر کسی گاڑی کے پاس ای ٹی ایس سرٹیفکیٹ یا گرین اسٹیکر نہیں ہوگا تو وہ سڑکوں پر نہیں چل سکے گی اور اسے فوراً ضبط کر لیا جائے گا۔

ڈاکٹر عمران حامد شیخ نے کہا کہ ای پی اے پنجاب نے لاہور میں آلودگی پھیلانے والی گاڑیوں کے خلاف سخت کارروائی شروع کر دی ہے۔ شہریوں کو خبردار کیا گیا ہے کہ وہ اپنی گاڑیوں کے اخراج اور شور کی جانچ لازمی کروائیں۔ ای ٹی ایس سے غیر تصدیق شدہ گاڑیوں کو قانونی کارروائی کا سامنا کرنا پڑے گا اور ایسی گاڑیوں کو ضبط بھی کیا جائے گا۔

انہوں نے کہا کہ ای پی اے پنجاب نے لاہور سے آلودگی کے خلاف سخت مہم کا آغاز کیا ہے۔ اس مہم کا مقصد شہریوں میں ماحول دشمن گاڑیوں کے خلاف زیرو ٹالرینس پالیسی کے تحت آگاہی پیدا کرنا ہے۔

 انہوں نے شہریوں سے اپیل کی ہے کہ وہ اپنی گاڑیوں کی ایگزاسٹ ٹیسٹنگ فوری طور پر مکمل کروائیں تاکہ گاڑیوں کے ضبط ہونے سے بچا جا سکے۔