ای چالان کیخلاف کراچی میں بڑا قدم اٹھا لیا گیا

کراچی میں سڑکوں اور ٹرانسپورٹ کے نظام کا حال انتہائی خراب ہو چکا ہے۔ اس کے ساتھ ہی شہریوں پر ای چالان کی بھاری رقم بھی عائد کی جا رہی ہے، جس پر مختلف حلقوں میں بے چینی پھیل گئی ہے۔

 ایم کیو ایم نے اس معاملے پر سندھ اسمبلی میں تحریک التواء جمع کرادی ہے تاکہ ان مسائل کی طرف حکومت کی توجہ مبذول کرائی جا سکے۔ تحریک التواء ایم کیو ایم کے رکن اسمبلی عادل عسکری نے جمع کرائی ہے، جس میں شہر اور صوبے کی سڑکوں کی حالتِ زار پر شدید تشویش کا اظہار کیا گیا ہے۔

 قرارداد میں کہا گیا ہے کہ ٹوٹی پھوٹی سڑکیں اور غیر فعال ٹریفک سگنلز شہر کے اندر نہ صرف ٹریفک کے مسائل بڑھا رہے ہیں بلکہ حادثات کا بھی سبب بن رہے ہیں۔ سڑکوں پر نشانات کی کمی، زیبرا کراسنگ اور ٹریفک سائن بورڈز کی عدم موجودگی کی وجہ سے ٹریفک قوانین کی پابندی کرنا شہریوں کے لیے ایک مشکل کام بن چکا ہے۔

عادل عسکری نے کہا کہ شہر کی سڑکوں پر مافیاز اور غیر قانونی قابضین نے قبضہ کر کے ٹریفک کی روانی میں مزید رکاوٹ پیدا کر دی ہے۔ ان حالات میں شہریوں کو ای چالان بھیجنا سراسر ناانصافی ہے کیونکہ جب تک سڑکوں اور انفراسٹرکچر کی مرمت نہیں کی جاتی، ایسے فیصلے شہریوں کے لیے قبل از وقت اور نقصان دہ ثابت ہو سکتے ہیں۔

ایم کیو ایم کی جانب سے مطالبہ کیا گیا ہے کہ سڑکوں کی فوری مرمت کی جائے، سگنلز اور ٹریفک سائن بورڈز کی کمی پوری کی جائے، اور تجاوزات کو ہٹانے کے لیے ایک جامع منصوبہ شروع کیا جائے۔ جب تک ان مسائل کا حل نہیں نکلتا، ای چالان سسٹم کو معطل کر دینا چاہیے تاکہ شہریوں کو مزید مشکلات کا سامنا نہ ہو۔