اگر کابل نے تصادم کا راستہ اپنایا تو پاکستان جواب دینے کی بھرپور صلاحیت رکھتا ہے، خواجہ آصف

وفاقی وزیر دفاع خواجہ آصف نے کہا ہے کہ اگر کابل نے تصادم کا راستہ اپنایا تو پاکستان جواب دینے کی بھرپور صلاحیت رکھتا ہے۔

تفصیلات کے مطابق وفاقی وزیر دفاع خواجہ آصف نے عرب ٹی وی کو دیے گئے اپنے انٹرویو میں کہا کہ بھارت اور افغان طالبان کے درمیان گہرے روابط ہیں اور طالبان بھارت کی پراکسی بن کر پاکستان کے خلاف کم شدت کی جنگ میں ملوث ہیں۔

انہوں نے کہا کہ بھارت کابل حکومت کی پشت پناہی کر رہا ہے اور افغان سرزمین کو پاکستان کے خلاف استعمال کیا جا رہا ہے۔

ان کا کہنا تھا کہ طالبان کے ایک وزیر کی بھارت میں موجودگی کے دوران پاکستان اور افغانستان کے درمیان جھڑپیں ہوئیں جن میں ہمارے بے شمار جوانوں نے جامِ شہادت نوش کیا۔

خواجہ آصف نے کہا کہ پاکستان نے افغان جارحیت کا سخت جواب دیا اور آئندہ بھی ایسی کسی بھی کارروائی پر بھرپور ردعمل دیا جائے گا۔

وفاقی وزیر دفاع کا کہنا تھا کہ چند ماہ قبل پاکستان نے بھارت کو جنگ میں بدترین شکست دی، اور پاکستان نے بھارت کے 7 طیارے مار گرائے جس کا اعتراف خود امریکی صدر ڈونلڈ ٹرمپ نے متعدد مرتبہ کیا ہے۔

انہوں نے کہا کہ اگر افغان سرزمین پاکستان کے خلاف دہشت گردی کے لیے استعمال کی گئی تو اسلام آباد خاموش نہیں رہے گا۔

ان کا مزید کہنا تھا کہ ہم نے ہمیشہ امن کی خواہش رکھی لیکن اگر کابل نے تصادم کا راستہ اپنایا تو پاکستان جواب دینے کی بھرپور صلاحیت رکھتا ہے۔