کیپٹن ڈاکٹر نعمان سلیم شہید؛ سپاہی کے بیٹے کی عظمت اور شہادت کی داستان

پاک فوج کے کیپٹن ڈاکٹر نعمان سلیم شہید نے کرم میں 29 اکتوبر 2025 کو وطن کی خاطر اپنی جان نثار کر کے وہ بلند مقام حاصل کیا جس کی تمنا ہر محبِ وطن کے دل میں ہوتی ہے۔

صرف 24 سال کی عمر میں مادرِ وطن پر قربان ہونے والے کیپٹن ڈاکٹر نعمان سلیم کا تعلق میانوالی کے ایک سادہ مگر باہمت گھرانے سے تھا۔ وہ پاک فوج کے انفینٹری کے ریٹائرڈ سپاہی محمد سلیم کے فرزند تھے، جنہوں نے محدود وسائل اور انتھک محنت سے اپنے بیٹے کو ڈاکٹر بنانے کا خواب پورا کیا۔

کیپٹن ڈاکٹر نعمان سلیم نے 2018 میں آرمی میڈیکل کالج میں میرٹ کی بنیاد پر داخلہ حاصل کیا، جہاں داخلہ لینا ہزاروں نوجوانوں کا خواب ہوتا ہے۔ ایک سپاہی کے بیٹے نے اپنی قابلیت، عزم اور محنت کے بل پر نہ صرف کامیابی حاصل کی بلکہ تعلیمی میدان میں نمایاں کارکردگی دکھا کر سب کو متاثر کیا۔

انہوں نے 2023 میں ایم بی بی ایس مکمل کیا اور 2024 میں پاک فوج میں کیپٹن ڈاکٹر کے طور پر شمولیت اختیار کی۔ ابتدائی طور پر وہ ملٹری ہسپتال راولپنڈی میں تعینات رہے، جہاں ان کی پیشہ ورانہ مہارت اور نظم و ضبط سب کے لیے مثال بن گیا۔

ان کی شاندار کارکردگی کو دیکھتے ہوئے انہیں کرم کے محاذ پر عسکری خدمات کے لیے تعینات کیا گیا، جہاں صرف 20 دن بعد ہی وہ خوارج کے خلاف لڑتے ہوئے جامِ شہادت نوش کر گئے۔

کیپٹن ڈاکٹر نعمان سلیم شہید کے خاندان کے دیگر افراد بھی اعلیٰ تعلیم یافتہ ہیں، ایک بھائی ایک اہم ادارے میں خدمات انجام دے رہے ہیں جبکہ ان کی چھوٹی ہمشیرہ ایم بی بی ایس کی تعلیم حاصل کر رہی ہیں۔

یہ شہادت صرف ایک فرد کی نہیں بلکہ ایک ایسے خاندان کی قربانی ہے جو اپنی زندگیاں قوم اور وطن کے لیے وقف کر چکا ہے۔

کیپٹن ڈاکٹر نعمان سلیم شہید اس بات کی زندہ مثال ہیں کہ اگر ایمان، محنت، اور عزم ہو تو کامیابی کسی مخصوص طبقے کی میراث نہیں۔ وہ اُن تمام نوجوانوں کے لیے مشعلِ راہ ہیں جو یقین رکھتے ہیں کہ خواب سچے ہو سکتے ہیں اگر اُن کے پیچھے سچائی اور جذبہ ہو۔

ریاست اور سیکیورٹی ادارے خوارج کے خلاف بھرپور کارروائی جاری رکھے ہوئے ہیں تاکہ ملک میں امن قائم رہے اور شہداء کی قربانیاں رائیگاں نہ جائیں۔